Трамп: Ўзбекистон уч йил ичида АҚШ иқтисодиётига 35 миллиард доллар инвестиция киритади

Тошкент, Ўзбекистон (UzDaily.uz) — АҚШ президенти Дональд Трамп маълум қилишича, Ўзбекистон уч йил давомида маҳсулот хариди ва инвестициялар орқали Америка иқтисодиётига деярли 35 миллиард доллар йўналтиради.

«АҚШ ва Ўзбекистон ўртасидаги ҳайратланарли савдо-иқтисодий келишув ҳақида хабар берганимдан мамнунман, — деб ёзди Трамп Truth Social ижтимоий тармоғида. — Кейинги уч йилда Ўзбекистон стратегик аҳамиятга эга фойдали қазилмаларни қазиб чиқариш, авиация, автоқисмлар ишлаб чиқариш, инфратузилма, қишлоқ хўжалиги, энергетика, кимё саноати, ахборот технологиялари ва бошқа муҳим соҳаларни ўз ичига олган асосий америкалик тармоқларда маҳсулотлар сотиб олади ҳамда деярли 35 миллиард доллар миқдорида инвестиция киритади».

Унинг сўзларига кўра, кейинги ўн йил ичида умумий инвестициялар ҳажми 100 миллиард доллардан ошади.

Америка раҳбари Ўзбекистон президенти Шавкат Мирзиёевга миннатдорлик билдирди ва АҚШ республика билан «узоқ ва самарали муносабатлар»га тайёр эканини таъкидлади.

Аввалроқ Трамп Оқ уйда Марказий Осиё мамлакатлари — Қозоғистон, Қирғизистон, Тожикистон, Туркманистон ва Ўзбекистон етакчилари билан «С5+1» форматидаги саммит доирасида учрашув ўтказган эди.