Тошкентни ҳайратга солган воқea: Yandex Go ҳайдовчиси сафар вақтида йўловчининг туғруғини қабул қилди

Тошкент, Ўзбекистон (UzDaily.uz) — 21 октябрь куни Тошкентда ҳайратланарли воқea содир бўлди: Yandex Go орқали буюртмаларни бажараётган ҳайдовчи йўловчини олиб кетаётган пайтда унинг туғруғини қабул қилди. Тақдир тақозоси билан ҳайдовчи амалиётчи пулмонолог шифокор бўлиб чиқди — у ёздан бери таксида қўшимча ишлаётган эди. Қизалоқ тўғридан-тўғри автомобил ичида дунёга келди ва ҳайдовчининг тезкор ҳаракати туфайли барчаси яхшилик билан тугади.

Ҳайдовчининг сўзларига кўра, бу унинг ўша кунги биринчи буюртмаси бўлган. У тахминан соат 11:30 ларда Бектемир туманида чақириқ қабул қилган. Машинага ҳомиладорликнинг охирги ойларида бўлган аёл, унинг қайнонаси ва кичик фарзанди чиққан. Машинага ўтирган заҳотиёқ аёлда туғруқ оғриқлари бошланиб бўлган эди. Оила 5-шаҳар туғруқхонасига йўл олган, бироқ у ерга етиб боришга улгуришмаган.

«Атиги бир неча километр юрганимиздан сўнг туғруқ бошланганини англадим. Дарҳол машинани тўхтатдим ва қўлимдан келганча ёрдам бердим. Тиббий тажрибам жуда асқотди, ўша пайтда фақат она ва боланинг аҳволини ҳақида ўйлардим», — дейди ҳайдовчи.

У қайнона билан бирга туғруқни автомобилнинг ўзидаёқ муваффақиятли қабул қилди — чақалоқ йиғлаганча дунёга келди ва мустақил нафас ола бошлади. Шундан сўнг ҳайдовчи она ва янги туғилган чақалоқни энг яқин тез тиббий ёрдам пунктига олиб борди. У ерда уларни шифокорлар кутиб олди, зарур ёрдам кўрсатилди ва туғруқхонага етказилди.

Ҳайдовчининг айтишича, она ва боланинг аҳволи барқарор бўлган, ҳаёт учун хавф кузатилмаган. Чақалоқнинг исми унга ҳали маълум эмас, бироқ бу кун унинг хотирасида абадий қолишини айтади.

«Мен шунчаки ўз бурчимни адо этдим. Ёрдам берганимдан хурсандман. Эҳтимол, бу ҳаётимдаги энг ғайриоддий чақириқ бўлса керак», — дея табассум билан қўшимча қилди у.