Тошкентдаги «Катта дубулға» турнирида ўзбек дзюдочилари битта кумуш ва икки бронза медалини қўлга киритди

Тошкент, Ўзбекистон (UzDaily.uz) — 28 февраль куни бўлиб ўтган мусобақа куни якунларига кўра, Ўзбекистон дзюдо терма жамоаси Тошкентда ўтказилаётган нуфузли «Катта дубулға» турнирида битта кумуш ва икки бронза медали билан миллий медаллар жамғармасини бойитди.

Куннинг асосий қаҳрамонларидан бири терма жамоа етакчиси Шахрам Аҳадов бўлди. У турнирни кумуш медаль билан якунлади. 73 кг гача бўлган вазн тоифасидаги финал беллашувда ўзбек спортчиси Тожикистон вакили Ориф Абдуллоевга мағлуб бўлиб, иккинчи ўринни эгаллади.

Навбатдаги бронза медалини миллий жамоага 81 кг гача бўлган вазн тоифасида иштирок этган Муроджон Йўлдошев олиб келди. У учинчи ўрин учун ўтган беллашувда ватандоши Арслон Тожиевни мағлуб этиб, якуний ҳисобда шоҳсупанинг учинчи поғонасидан жой олди.

Яна бир бронза медали ўзбек дзюдочилари ўртасидаги ички рақобатда қўлга киритилди. 73 кг гача бўлган вазн тоифасида учинчи ўрин учун кечган беллашувда Муҳаммад Жумаев ва Элбек Тожиев тўқнаш келди. Кескин ва муросасиз кураш Тожиевнинг ғалабаси билан якунланиб, у бронза медали соҳиби бўлди.