Тошкентдаги ҳайдовчилар автобус бекатларида тўхташ тақиқлангани ҳақида огоҳлантирилди

Тошкент, Ўзбекистон (UzDaily.uz) — Тошкент шаҳрида Ички ишлар бош бошқармаси Йўл ҳаракати хавфсизлиги бошқармаси ходимлари жамоат транспортининг эркин ҳаракатини таъминлашга қаратилган профилактик рейдлар ўтказмоқда.

Алоҳида эътибор автобус бекатларида тўхтаётган ёки транспорт воситаларини қўяётган ҳайдовчиларга қаратилмоқда. Бундай ҳолатлар автобусларнинг бекатга яқинлашишига тўсқинлик қилади.

ЙҲХБД маълумотига кўра, қоидабузарликларнинг аксарияти ҳайдовчилар бекатлар яқинида жойлашган дўкон ва савдо нуқталари олдида тўхтаб, сув, овқат ёки бошқа товарларни харид қилиш учун машинасини қолдириши натижасида содир бўлмоқда.

Натижада автобуслар платформага яқинлаша олмайди, йўловчилар эса тўғридан-тўғри йўл қатнов қисмига тушишга мажбур бўлади. Бу эса йўл-транспорт ҳодисалари хавфини оширади.

Рейдлар давомида ҳайдовчилар билан профилактик суҳбатлар ўтказилмоқда, қоидабузарларга нисбатан эса маъмурий чоралар қўлланилмоқда. Инспекторлар автобус бекатлари фақат жамоат транспорти ва йўловчиларни тушириш ҳамда чиқариш учун мўлжалланганини, ҳайдовчиларнинг шахсий эҳтиёжлари эса қоидаларни бузиш учун асос бўла олмаслигини эслатмоқда.

Tаъкидланишича, айрим автомобилистлар қулайлиги учун автобуслар ҳаракатига тўсқинлик қилиш ва йўловчилар ҳуқуқларини чеклаш мумкин эмас.

Ушбу қоидаларга риоя қилиш йўл ҳаракати иштирокчиларининг барчаси учун хавфсизлик ва қулайликни таъминлайди.