Тошкентдаги Aviator савдо мажмуасида юз берган ёнғин бир ярим соат ичида тўлиқ бартараф этилди

Тошкент, Ўзбекистон (UzDaily.uz) — Тошкент шаҳридаги Aviator савдо мажмуасида содир бўлган ёнғин бир ярим соатдан кам вақт ичида тўлиқ ўчирилди, жабрланганлар йўқ, деб хабар берди пойтахт Фавқулодда вазиятлар бошқармаси.

Яшнобод туманидаги Паркент йўли кўчасида жойлашган савдо мажмуасида ёнғин чиққанлиги ҳақидаги хабар 31 январь куни соат 15:47 да фавқулодда хизматларга келиб тушган. Орадан олти дақиқа ўтиб, соат 15:53 да ёнғин-қутқарув бўлинмалари ҳодиса жойига етиб келган.

Биринчи навбатда бинода бўлган барча ташриф буюрувчилар ва ходимлар эвакуация қилинган.

Ёнғин соат 16:50 да локализация қилинган, соат 17:17 да эса тўлиқ бартараф этилган. Ўчириш ишлари Фавқулодда вазиятлар вазири раҳбарлигида олиб борилгани қайд этилди.

Дастлабки маълумотларга кўра, ҳодиса оқибатида ҳеч ким жабр кўрмаган. Айни пайтда мутахассислар ёнғин сабабларини аниқламоқда ва моддий зарар ҳажмини баҳоламоқда.