Тошкентда Юнусободдаги дўкон олдида тўпланган рухсатсиз гуруҳ тарқатилди

Тошкент, Ўзбекистон (UzDaily.uz) — Тошкентда ҳуқуқни муҳофаза қилувчи органлар ходимлари Юнусобод тумани «Марказ-5» массивидаги дўконлардан бири олдида тўпланган рухсатсиз гуруҳни тарқатди. Бу ҳақда пойтахт ИИББ матбуот хизмати хабар берди.

Тўпланишга дўконнинг ижтимоий тармоқдаги саҳифасида чоп этилган эълон сабаб бўлган. Дўкон эгаси спорт билан шуғулланувчилар учун мўлжалланган озиқ-овқат қўшимчалари — витаминлар, минераллар ва бошқа маҳсулотларни бепул тарқатишини маълум қилган.

Эълондан кейин дўкон олдида кўп сонли фуқаролар тўпланди, аммо бундай оммавий тадбир ўтказиш учун рухсатнома олинмаган эди.

Ҳодиса жойига милиция ходимлари етиб келиб, вазиятни назоратга олди ва одамларни тарқатди. ИИББ таъкидлашича, ҳодиса вақтида ҳеч ким жабрланмаган.

Ҳозирда Юнусобод туман ИИБ дўкон эгаларининг ҳаракатларига ҳуқуқий баҳо бериш мақсадида текширув ўтказмоқда. Унинг натижаларига кўра тегишли қарор қабул қилинади.