Tошкентда Шота Руставели кўчасида марказий автобус йўлаги жорий этилади

Тошкент, Ўзбекистон (UzDaily.uz) — 2025 йил 7 октябрдан бошлаб Тошкент шаҳрида Шота Руставели кўчасида марказий автобус йўлаги ишга тушади. Лойиҳанинг илк босқичида ушбу йўлакдан 37-, 57- ва 58-сонли йўналишлар ҳаракатланади, деб хабар берди Ўзбекистон Транспорт вазирлиги.

Вазирлик маълумотига кўра, мазкур лойиҳа жамоат транспортининг устуворлигини ошириш, тирбандликларни камайтириш ҳамда йўловчилар учун қулай ва хавфсиз шарт-шароит яратишга қаратилган.

Янги тизим ишга тушиши билан автобуслар марказий ажратилган йўлак бўйлаб ҳаракатланади. Йўловчиларнинг чиқиш ва тушиш жойлари йўлнинг ўрта қисмида махсус жиҳозланган платформаларда амалга оширилади. Платформага чиқиш фақат белгиланган пиёдалар ўтиш жойлари орқали рухсат этилади, белгиланмаган жойдан йўлни кесиб ўтиш қатъий тақиқланади.

Йўловчиларга хавфсизлик қоидаларига риоя этиш зарурлиги эслатилди: йўлни фақат «зебра чизиғи» орқали кесиб ўтиш, автобусгa олд томондан айланиб ўтиш, уни сариқ хавфсизлик чизиғи ортида кутиш ва транспорт тўлиқ тўхтаганидан сўнггина эшикка яқинлашиш тавсия этилади. Шунингдек, бекатларда мобил телефондан фойдаланишда эҳтиёткорликка алоҳида эътибор қаратиш сўралди.

Шота Руставели кўчасидаги марказий йўлак фақат автобуслар ҳаракати учун мўлжалланган. Бошқа транспорт воситаларининг ушбу йўлакка кириши, тўхташи ёки кесиб ўтиши қонунбузарлик сифатида баҳоланади. Ҳайдовчилар автобусларга рухсат этилган чорраҳаларда йўл беришлари ҳамда кўча бўйлаб чапга бурилиш ёки орқага қайриш ҳаракатларини фақат махсус белгиланган жойларда амалга оширишлари лозим.

Маҳаллий ҳокимият таъкидлашича, марказий автобус йўлагининг жорий этилиши Тошкент транспорт тизимини модернизация қилиш йўлидаги муҳим қадамдир. Барча йўл ҳаракати иштирокчилари ўзаро ҳурмат, диққат ва йўл маданиятига амал қилишга чақирилди.