Тошкентда Ўзбекистоннинг 2030 йилгача бўлган киберхавфсизлик стратегиясини амалга ошириш масалалари муҳокама қилинди

Тошкент, Ўзбекистон (UzDaily.uz) — Sputnik Ўзбекистон мультимедиа матбуот марказида Тошкент – Москва ўртасида «Ўзбекистон киберхавфсизлик стратегияси: ҳимоянинг янги механизмлари» мавзусида видеокўприк бўлиб ўтди.

Тошкентда «Киберхавфсизлик маркази» ДУК идоралараро ҳамкорлик бўлими бошлиғи Альберт Валиев ҳамда Тошкент шаҳар ИИББ Ахборот технологиялари соҳасидаги жиноятларга қарши курашиш бошқармаси ходими Мадина Мамадалиева иштирок этди. Москвадан эса ахборот хавфсизлиги бўйича эксперт Алексей Лукацкий қатнашди.

Ўзбекистон Президенти Шавкат Мирзиёев томонидан 2026 йил 10 март куни 2030 йилгача мўлжалланган Киберхавфсизлик стратегиясини тасдиқлади.

Экспертлар ҳужжатнинг асосий қоидалари, давлат ахборот тизимлари ва муҳим инфратузилмани ҳимоя қилишни кучайтириш чоралари, шунингдек давлат органларида ихтисослашган киберхавфсизлик бўлинмаларини ташкил этиш масалаларини муҳокама қилдилар. Шунингдек, кибержиноятчиликнинг олдини олиш, идоралараро ҳамкорликни ривожлантириш ва халқаро ҳамкорлик масалаларига алоҳида эътибор қаратилди.

Алексей Лукацкийнинг таъкидлашича, стратегияда бугунги кунда жаҳонда тан олинган барча асосий йўналишлар инобатга олинган. Асосий эътибор таҳдидларга жавоб беришдан кўра, уларнинг олдини олишга қаратилган.

Телефон орқали фирибгарлик ҳолатлари ҳам кўриб чиқилди. Қайд этилишича, бундай қўнғироқларнинг катта қисми хориждан, жумладан Украина, Польша ва бошқа давлатлардан амалга оширилади. Бундай таҳдидларга қарши кураш комплекс ёндашувни талаб қилади — техник фильтрлашдан тортиб тезкор тергов ва халқаро ҳамкорликкача.

Шунингдек, 2026 йилда дипфейклар ва сунъий интеллектдан фойдаланган ҳужумлар, айниқса ижтимоий тармоқлар ва интернетдаги асосий таҳдидлардан бирига айланиши мумкинлиги таъкидланди.

Тадбир иштирокчилари Россия тажрибаси кибертаҳдидлар ва фирибгарлик схемаларига қарши курашишда ўзбекистонлик мутахассислар учун фойдали бўлиши мумкинлигини ва бу соҳадаги ҳамкорлик катта салоҳиятга эга эканини қайд этдилар.