Тошкент, Ўзбекистон (UzDaily.uz) — 5 май куни Тошкент шаҳрида Ўзбекистон Республикаси ва Словакия Республикаси ўртасидаги Ҳукуматлараро Иқтисодий Ҳамкорлик Комиссиясининг биринчи йиғилиши бўлиб ўтди.

Йиғилишга Словакия Республикаси Иқтисодиёт вазири ўринбосари Владимир Шимонек ва Ўзбекистон Республикаси Инвестициялар, саноат ва савдо вазири ўринбосари Шоҳрух Ғуломов раислик қилди.

Томонлар ўзаро ҳамкорликни мустаҳкамлаш ва ривожлантиришга қаратилган кенг кўламли масалаларни муҳокама қилдилар. Савдо-иқтисодий ҳамкорлик алоҳида эътибор марказида бўлди. Ўзаро товар айирбошлаш ҳажмида ўсиш қайд этилди ва томонлар энергетика, фармацевтика, қишлоқ хўжалиги, рақамли технологиялар ва бошқа соҳалардаги савдони кенгайтиришга бўлган қизиқишларини тасдиқладилар.

Қўшма кўргазмалар, форумлар ва бизнес-миссияларни ташкил этиш, Словакия Экспорт банки орқали экспорт операцияларини молиялаштириш механизмларидан фойдаланиш ҳамда имтиёзли кредитлашни жорий этиш юзасидан келишиб олинди.

Йиғилишда энергетика ва қайта тикланувчи энергия манбалари, қишлоқ хўжалиги, шу жумладан, геология-қидирув ишлари, камёб ва ноёб ер минералларини қазиб олиш ва қайта ишлашни ўз ичига олган муҳим хомашё материаллари соҳаларида ҳамкорликни ривожлантириш истиқболлари кўриб чиқилди.

Транспорт ва автомобилсозлик соҳасида, халқаро транспорт коридорларини ривожлантириш, рақамлаштириш, молия ва солиқ соҳаси, меҳнат миграцияси, тиббий ва соғломлаштириш туризми, стандартлаштириш, метрология, гидрометеорология ҳамда бошқа техник ва илмий йўналишлардаги ҳамкорликни кучайтириш бўйича ташаббуслар қўллаб-қувватлашга келишилди.

Йиғилиш якунида эришилган келишувларни ўз ичига олган якуний баённома имзоланди ва Комиссиянинг навбатдаги йиғилиши Братиславада ўтказилиши бўйича чора-тадбирлар келишиб олинди.