Тошкентда наркотиклар савдоси учун мўлжалланган Telegram-бот эгалари қўлга олинди

Тошкент, Ўзбекистон (UzDaily.uz) — Тошкент шаҳри Юнусобод туманида наркотиклар савдоси амалга оширилган Telegram-бот эгалари қўлга олинди, дея хабар берди пойтахт ИИББ матбуот хизмати.

Мутахассислар наркотик ва психотроп моддалар муомаласи, шунингдек криптоактивларни қабул қилиш, ўтказиш ва айирбошлаш учун яратилган ботни аниқлади.

Рейд давомида уч нафар фуқаро қўлга олинди.

Ҳодиса жойидан тўртта мобил телефон, учта ноутбук, 12 та банк картаси, 11 та SIM-карта ҳамда қоғозга ўралган наркотик моддалар мусодара қилинди.

Икки нафар гумонланувчининг телефонларини кўздан кечириш натижасида хорижий ва бошқа электрон криптокошелёклар орқали умумий айланмаси 2,3 млн АҚШ долларини ташкил этган тахминан 95 мингта транзакция аниқланди.

Учинчи гумонланувчининг яшаш жойида эса 550 дона кучли таъсир қилувчи дори воситалари топилди.

Мазкур ҳолат юзасидан Жиноят кодексининг тегишли моддалари бўйича жиноят иши қўзғатилди, барча қўлга олинган шахслар ҳибсда сақланмоқда.