Тошкент, Ўзбекистон (UzDaily.uz) — Тошкент шаҳрида иссиқ сув таъминоти ва иссиқлик таъминоти учун тарифларни ошириш тасдиқланди. 22 август куни шаҳар халқ депутатлари кенгашининг қарорига мувофиқ, Veolia Energy Tashkent компаниясининг таклифи қўллаб-қувватланди.

Ҳужжатга кўра, аҳоли учун чакана тариф 15% га оширилиб, ҚҚСсиз 121 617 сўмдан 139 860 сўмгача (1 Гкал учун) кўтарилади. Тарифлар охирги марта ўтган йил 15 ноябрда ўзгартирилган эди.

Юридик шахслар учун ўсиш 40% ни ташкил этади — 244 497 сўмдан 342 296 сўмгача. Ноябр ойида бу тоифа учун ошириш 15% бўлган эди.

Базавий тариф 7% га ўсиб, 664 465 сўмдан 711 641 сўмгача етади. Бюджет ташкилотлари учун эса ўсиш 18,8% ни ташкил этиб, 801 963 сўмдан 952 797 сўмгача кўтарилади.

Янги тарифларнинг амалга кириш санаси ҳали белгиланмаган. Компания уларни 2025 йил 1 октябрдан қўллашни таклиф этган. Қонунчиликка кўра, ҳужжатни шаҳар ҳокими Шавкат Умурзаков имзолагандан сўнг 15 кун ичида кучга киради.

Veolia Energy Tashkent бош директори Севара Пардаева таъкидлашича, бугунги кунда пойтахт аҳолиси базавий тарифнинг атиги 18% ни тўлайди, қолган қисми шаҳар бюджети ҳисобидан субсидия қилинади. Унинг айтишича, 2030 йилга қадар иссиқлик ва иссиқ сув таъминотида тўлиқ субсидиядан воз кечиш режалаштирилган.

«Бу жуда муҳим ва осон бўлмаган вазифа. Биз ушбу масалани Молия вазирлиги билан ҳамкорликда кўриб чиқмоқчимиз. Вазирликнинг ҳозирги сиёсати — манзилли субсидия бериш, яъни ёрдамга ҳақиқатан муҳтож оилаларни қўллаб-қувватлашдир», — деди Пардаева 12 август куни бўлиб ўтган кенгаш мажлисида.

Компаниянинг мақсади — беш йил ичида тарифларни тўлиқ мижозлар ҳисобидан қоплашга эришиш.

Пардаева қўшимча қилиб, жорий йилда газ ва электр энергияси учун тарифлар одатдагидек 1 апрелдан эмас, балки 1 майдан оширилгани, иссиқлик манбалари учун эса 15 июндан кўтарилганини эслатиб ўтди.

«Бизда бошқа йўл йўқ. Ошириш шарт. Агар бундан кейин ҳам чора кўрилмаса, келажакда тарифларни 30% эмас, балки 40–50% га оширишга тўғри келади», — деди компания раҳбари.