Тошкентда ижтимоий тармоқлар орқали инсон аъзоларининг ноқонуний савдоси билан шуғулланган гуруҳ қўлга олинди

Тошкент, Ўзбекистон (UzDaily.uz) — Ички ишлар вазирлигининг оператив-қидирув фаолияти департаменти ходимлари Давлат хавфсизлик хизмати билан ҳамкорликда Тошкент шаҳрида инсон аъзоларини сотиб олиш ва сотиш билан боғлиқ битимларни ташкил этганликда гумонланаётган фуқароларни қўлга олди. Бу ҳақда ИИВ матбуот хизмати хабар қилди.

Тергов маълумотларига кўра, аввал безорилик жинояти учун судланган 36 ёшли эркак рафиқаси билан биргаликда фойдаланувчиларда раҳм-шафқат уйғотувчи видеоматериаллар тайёрлаб, уларни интернет орқали тарқатган.

Шундан сўнг у ижтимоий тармоқлар орқали инсон аъзолари ва тўқималарининг ноқонуний савдоси билан тизимли равишда шуғулланган. Гумонланувчи донорлар ва даволанишга муҳтож беморларни Тожикистоннинг Душанбе шаҳрида жойлашган «Истиқлол» клиникасига олиб борган, у ерда ўзи ҳам буйрак кўчириб ўтказиш бўйича операциядан ўтган.

Оператив-қидирув тадбирлари давомида жиноий фаолиятни ташкил этишга кўмаклашган шахслар ҳам аниқланди.

Улар орасида Telegram, Instagram ва YouTube ижтимоий тармоқларидаги каналлар маъмури бўлиб, у гумонланувчига фаол ёрдам кўрсатган.

Мазкур ҳолат юзасидан Ўзбекистон Республикаси Жиноят кодексининг 133-1-моддаси 2-қисми — «Инсон аъзолари ва (ёки) тўқималарини сотиб олиш-сотиш» бўйича жиноят иши қўзғатилди. Асосий гумонланувчига нисбатан қамоққа олиш тарзида эҳтиёт чораси қўлланилди.

Тергов давом этмоқда, гуруҳ фаолияти кўламини аниқлаш ва барча иштирокчиларни фош этишга қаратилган комплекс тадбирлар амалга оширилмоқда.