Тошкентда ҳуқуқни муҳофаза қилиш органи ходимига 10 минг доллар пора бермоқчи бўлган эркак қўлга олинди

Тошкент, Ўзбекистон (UzDaily.uz) — Тошкентнинг Шайхонтоҳур туманида гиёҳванд моддалар сақлаганликда гумон қилинган фуқаро жиноий жавобгарликдан қутулиш мақсадида ҳуқуқни муҳофаза қилиш органи ходимига 10 минг доллар пора бермоқчи бўлди.

Ҳодиса махсус операция давомида рўй берган. Текширув жараёнида маҳаллий аҳоли вакилининг уйидан гиёҳванд моддалар топилган. У жиноий иш қўзғатилишининг олдини олиш учун оператив бўлинма ходимига 10 минг доллар таклиф қилган. Бир неча марта поранинг қонуний эмаслиги ҳақида огоҳлантирилганига қарамай, у таклифидан қайтмаган.

Пора таклиф қилинган ходим бу ҳолат ҳақида дарҳол Тошкент шаҳар ИИББга мурожаат қилган ва раҳбариятни хабардор этган.

Шундан сўнг ИИВ ва прокуратура иштирокида қўшма махсус операция ташкил этилган. Гумонланувчи белgilangan маблағни топшириш пайтида қўлга олинган.

Унга нисбатан Жиноят кодексининг 211-моддаси («Пора бериш») бўйича жиноят иши қўзғатилган. Тергов ҳаракатлари давом этмоқда.

Пойтахт ИИББ маълумот беришича, 2025 йил бошидан буён Ўзбекистонда ҳуқуқни муҳофаза қилиш органлари ходимларига пора беришга уриниб кўрган 117 нафар фуқарога нисбатан жиноят иши очилган.