Тошкент, Ўзбекистон (UzDaily.uz) — Ўзбекистон пойтахтида Honor Uzbekistan компанияси томонидан Honor 400 серияси смартфонларининг расмий тақдимоти бўлиб ўтди.

Тадбирда технологик компаниялар вакиллари, IT-мутахассислар, журналистлар ҳамда мобил технологиялар соҳасидаги сўнгги тенденцияларга қизиқувчи блогерлар иштирок этди.

Презентация давомида Honor 400 ва Honor 400 Pro каби асосий моделлар тақдим этилди. Улар камера, ишлаш тезлиги ва энергия самарадорлиги каби хусусиятлари билан алоҳида эътиборни жалб этди. Янгиланган дизайн, маҳаллий истеъмолчиларнинг афзал кўришларини ҳисобга олган ҳолда ишлаб чиқилгани алоҳида таъкидланди.

Компания вакиллари смартфонларнинг техник имкониятларини намойиш этишди: кам ёруғликдаги суратга олиш, сунъий интеллект асосидаги функциялар, тез қувватлаш технологиялари ва бошқа афзалликлар кенг ёритилди. Шунингдек, республика бўйлаб расмий дистрибуция ва сервис тармоғини кенгайтириш режалари эълон қилинди.

Тақдимот чоғида HONOR Uzbekistan компаниясининг бош директори Чен Лонг сўзга чиқиб, Ўзбекистон компания учун Марказий Осиёдаги устувор бозорлардан бири эканини қайд этди. Унинг таъкидлашича, янги смартфонлар сериясининг тақдим этилиши бренднинг бозордаги мавқеини мустаҳкамлаш ва инновацион ечимларни арзон нархларда таклиф этишга интилишини англатади.

Тадбир смартфонларнинг интерактив намойиши ва меҳмонлар ўртасида совғалар ўйини билан якунланди.