Тошкент, Ўзбекистон (UzDaily.uz) — 1 март куни Тошкентда газ портлаши натижасида жабрланган бола касалхонага олиб кетилаётган вақтда вафот этди. Бу ҳақда пойтахт ҳокимлиги матбуот хизмати хабар берди.

Расмий маълумотларга кўра, қутқарув ишлари давомида олти нафар фуқаро эвакуация қилинган. Ҳодиса натижасида бир неча киши жабрланган, улар орасида икки нафар бола бор. Бир бола касалхонага олиб кетилаётган пайтда вафот этган, иккинчиси эса ҳозирда шифокорлар назорати остида.

Ҳама жабрланганлар тез тиббий ёрдам бригадаларига топширилган. Ҳозирда уйни тиклаш ишлари олиб борилмоқда.

Фавқулодда вазиятлар бошқармаси хабарига кўра, портлашга қасддан содир этилган ҳаракат сабаб бўлган. Уйда яшовчи бир эркак ўз жонига қасд қилиш мақсадида газ плитасини ёқиб қўйган. Ҳавода газ аралашмаси тўпланиши натижасида ёнғин ва портлаш содир бўлган. Ўша эркак 9-қаватдан ўзини ташлаб, вафот этган.

Эслатиб ўтамиз, портлаш 1 март куни тахминан соат 15:23 да Мирзо-Улуғбек тумани Қорасув маҳалласи "Гулсанам" 4-кварталида содир бўлган.

Аввалроқ ФВБ ҳодиса натижасида жабрланганлар ҳақида маълумот йўқлигини билдирган эди. Ҳозирда ҳодиса жойида ҳуқуқ-тартибот органлари ва қутқарувчилар иш олиб бормоқда.