Тошкент, Ўзбекистон (UzDaily.uz) — Тошкентда бешта кўчада ҳаракат тезлиги чекловини ошириш режалаштирилмоқда. Бу ҳақда 12 август куни шаҳар Ички ишлар бош бошқармаси Йўл ҳаракати хавфсизлиги бошқармаси бошлиғининг ўринбосари Элмурод Алимов пойтахт халқ депутатлари Кенгаши сессиясида маълум қилди.

Унинг сўзларига кўра, Бунёдкор, Себзор, Ахмад Дониш, Янги Ўзбекистон кўчалари ва Тошкент ҳалқа автомобиль йўлида ҳозирги 60 км/соат тезлик чекловини 80 км/соатга ошириш таклиф этилмоқда.

Бундан ташқари, ўтказилган тадқиқотлар ва халқаро тажриба асосида пойтахтнинг ўн икки кўчасида бир томонлама ҳаракат тизимини жорий этиш таклифи илгари сурилган (кўчалар рўйхати ҳозирча ошкор этилмаган). Мазкур чора тирбандлик ва ЙҲҲ ходисаларини камайтириш, йўл ҳаракати хавфсизлигини ошириш ҳамда барча қатнашчилар учун қулайлик яратишга қаратилган.

Алимов шунингдек, электр таъминотидаги тез-тез узилишлар светофорлар ишида носозликларга олиб келаётганини, бу эса айрим пайтларда йўлларда бир неча соатлаб давом этадиган тартибсизликка сабаб бўлаётганини таъкидлади. Бундай ҳолларда ЙҲҲБ ходимлари ҳаракатни қўлда бошқаришга мажбур бўлади.

Ушбу муаммони ҳал этиш учун тахминан 500 та узлуксиз электр таъминоти манбалари (UPS) светофорларга ўрнатиш режалаштирилмоқда. Бу уларга ташқи электр таъминотисиз 5–6 соат автоном режимда ишлаш имконини беради.

Эслатиб ўтамиз, 2023 йил январь ойида республика комиссияси Тошкентдаги Кичик ҳалқа автомобиль йўли ичидаги айрим участкаларда, шунингдек, Наманган ва Урганч шаҳарларида максимал тезлик чекловини 60 км/соат этиб белгилаган эди. Ўша йил апрель ойида эса Вазирлар Маҳкамаси барча шаҳарларда, жумладан Тошкентда ҳам, тезлик режимини 70 км/соатдан 60 км/соатга туширди.