Тошкентда 400 мингдан ортиқ дарахт рақамлаштирилди

Тошкент, Ўзбекистон (UzDaily.uz) — Пойтахтда «Дарахтлар реестри» лойиҳаси амалга оширилиши давом этмоқда. Унинг доирасида green.tashkent.uz онлайн-платформасига 400 мингдан зиёд дарахт ҳақида маълумот киритилди.

Электрон маълумотлар базаси яшил ҳудудлар ҳақида тўлиқ ахборотни ўз ичига олади. Унда дарахт тури, ёши, ҳолати ва бошқа хусусиятлари қайд этилган. Барча маълумотлар дендролог мутахассислар томонидан қўшимча текширувдан ўтказилади, бу эса маълумотнинг аниқлиги ва ишончлилигини таъминлайди.

Лойиҳа Zamin халқаро жамоат фонди, Экология, атроф-муҳитни муҳофаза қилиш ва иқлим ўзгариши вазирлиги ҳамда Тошкент шаҳар ҳокимлиги ҳамкорлигида амалга оширилмоқда. Унинг асосий мақсади — пойтахт дарахтларининг тўлиқ инвентаризациясини ўтказиш ва яшил ҳудудларнинг рақамли харитасини яратишдан иборат.

Кутилаётганидек, электрон реестр қуйидаги йўналишларда муҳим воситага айланади: шаҳарсозлик режалаштиришида, парвариш ишлари ва янги кўчат экилган ҳудудларни ташкил этишда, яшил ҳудудларнинг ҳолати устидан жамоатчилик назоратини таъминлашда, мегаполиснинг табиий муҳитини асраб-авайлаш ва тиклашда.

Мутахассислар таъкидлашича, лойиҳанинг амалга оширилиши шаҳар аҳолиси ҳаёт сифатини сезиларли даражада оширишга, экологик вазиятни яхшилашга ва пойтахтда кўкаламзорлаштириш жараёнини янада очиқ ва самарали қилишга хизмат қилади.