Тошкент вилоятида болалар боғчаларида болаларнинг оммавий заҳарланиши иши бўйича 11 нафар шахс қамоққа олинди

Тошкент, Ўзбекистон (UzDaily.uz) — Тошкент вилоятида болалар боғчаларида болаларнинг оммавий заҳарланиши иши бўйича 11 нафар шахс қамоққа олинди

Тошкент вилоятида ҳудуддаги болалар боғчаларида болаларнинг оммавий заҳарланиши билан боғлиқ иш доирасида 11 нафар шахс ҳибсга олинди.

Аввал хабар қилинганидек, ўтган йилнинг сентябрь ойида бир қатор мактабгача таълим муассасаларида тарбияланувчилар орасида овқатдан заҳарланиш ҳолатлари қайд этилган. Барча болаларга «ошқозон-ичак трактининг ўткир функционал бузилиши, овқат токсикоинфекцияси» ташхиси қўйилган. Ҳодиса юзасидан Ўзбекистон Республикаси Жиноят кодексининг санитария қонунчилиги ёки эпидемияларга қарши кураш қоидаларини бузганлик учун жавобгарликни назарда тутувчи 257¹-моддаси 1-қисми билан жиноят иши қўзғатилган.

Олий суд матбуот хизмати маълум қилишича, иш 11 киши, жумладан, болалар боғчаларига маҳсулот етказиб берган бир нечта компаниялар раҳбарлари ва ходимлари билан боғлиқ.

Улар орасида «Shark Milk Product» МЧЖ директори Р. О., ушбу компаниянинг таъсисчилари ва сотув бўлими менежерлари, бош технологи ва технолог ёрдамчиси, шунингдек «Governess Business» МЧЖ, «Kinder Garden Group» МЧЖ, «Innavation Outsourcing Service» МЧЖ ҳамда «Nishon Invest» МЧЖ раҳбарлари бор. Айбланувчилар қаторига «Shark Milk Product» МЧЖ лаборатория ходими ҳам киритилган.

Барча судланувчиларга нисбатан Ўзбекистон Республикаси Жиноят кодексининг 186-моддаси 4-қисмининг "б" банди, яъни хавфсизлик талабларига жавоб бермайдиган маҳсулотларни ишлаб чиқариш, сақлаш, ташиш ёки сотиш билан боғлиқ, шунингдек, Ўзбекистон Республикаси Жиноят кодексининг 257-моддаси 1-қисми бўйича жиноий иш қўзғатилди.

Суд қарори билан айбланувчилардан 10 нафарига нисбатан қамоққа олиш тарзидаги эҳтиёт чораси қўлланилган, бир нафар шахс эса уй қамоғига олинган.

Р. О. (эркак, 1985 йилда Тошкент вилоятида туғилган, “Shark Milk Product” МЧЖ директори),

С. С. (эркак, 1985 йилда Тошкент вилоятида туғилган, “Shark Milk Product” МЧЖ таъсисчиси ва сотув бўлими менежери),

Ф. О. (эркак, 1990 йилда Тошкент вилоятида туғилган, “Shark Milk Product” МЧЖ таъсисчиси ва директори ўринбосари),

А. С. (эркак, 1987 йилда Қашқадарё вилоятида туғилган, “Shark Milk Product” МЧЖ бош технологи),

Р. Х. (эркак, 1982 йилда Тошкент вилоятида туғилган, “Shark Milk Product” МЧЖ технологи),

М. Н. (эркак, 1991 йилда Тошкент вилоятида туғилган, “Shark Milk Product” МЧЖ технологи ёрдамчиси),

Ж. Х. (эркак, 1993 йилда Бухоро вилоятида туғилган, “Governess Business” МЧЖ директори),

Ф. Д. (эркак, 1993 йилда Тошкент вилоятида туғилган, “Kinder Garden Group” МЧЖ директори),

И. С. (эркак, 2000 йилда Сирдарё вилоятида туғилган, “Innavation Outsourcing Servise” МЧЖ директори),

Б. Р. (эркак, 1992 йилда Сирдарё вилоятида туғилган, “Nishon invest” МЧЖ директори),

Д. Қ. (аёл, 1997 йилда Тошкент вилоятида туғилган, “Shark Milk Product” МЧЖ лаборанти)