Тошкент вилоятида атмосферани ифлослантирадиган манбаларни аниқлаш учун вертолёт патрули йўлга қўйилди

Тошкент, Ўзбекистон (UzDaily.uz) — Атмосфера ҳавосини ифлослантирувчи манбаларни назорат қилишни кучайтириш мақсадида Махсус комиссия Тошкент вилоятида вертолёт патрулини йўлга қўйди.

Бугунги аэро-патруль давомида Комиссия раҳбарлари А. Абдуҳакимов, Д. Қодиров вазият билан шахсан танишдилар ҳамда атмосфера ҳавосининг ифлосланиши бўйича аниқланган ҳолатлар юзасидан тегишли чоралар кўрилди.

Аэро-кузатув экологик меъёрларни бузаётган корхона ва объектларни, жумладан, яширин ёки етиб бориш қийин бўлганларини тезкор аниқлаш имконини беради. Бундай ёндашув мониторинг самарадорлигини сезиларли даражада оширади, ноқонуний ташламаларни аниқлашга ва дарҳол чоралар кўришга ёрдам беради.

Махсус комиссия экологик вазиятни барқарорлаштириш ва аҳоли саломатлигини ҳимоя қилиш бўйича комплекс чора-тадбирларни давом эттиради.