Тошкент, Ўзбекистон (UzDaily.uz) — Тошкент вилояти ҳокими Зойир Мирзаев бошчилигидаги делегация айни пайтда Хитой Халқ Республикасининг пойтахти Пекин шаҳрида бўлиб турибди. Бу ерда савдо ва инвестициявий ҳамкорликни кучайтириш борасида бир қатор манфаатли учрашувлар ўтказилмоқда.

Музокара ва мулоқотларда Ўзбекистон Республикаси Президенти Шавкат Мирзиёев ва Хитой Халқ Республикаси Раиси Си Сзинпиннинг икки халқ ўртасидаги дўст-биродарликни мустаҳкамлашга қаратилган оқилона сиёсати юксак ижобий самара бераётгани қайд этилди. Бугун биргина Тошкент вилоятида 700 дан ортиқ Хитой капитали иштирокидаги қўшма корхона фаолият юритмоқда, уларда ўн минглаб ватандошимиз меҳнат қилмоқда.   

Ўзбекистон Республикасининг ХХРдаги элчихонасида Зойир Мирзаев Шандун провинцияси тадбиркорлари билан мулоқот қилди. Музокараларда саноат, қурилиш, маиший хизмат кўрсатиш соҳаларида ҳамкорликни ривожлантириш масалалари хусусида сўз борди. Шунингдек, аҳоли дам олиш масканлари, хиёбон ва истироҳат боғларини қайта тикланувчи энергияга ўтказиш, "Хитой тажрибаси" асосида қайта жиҳозлаш борасида томонлар фикр алмашдилар.

Музокараларда Шандун провинцияси илмий-оммабоп тадқиқотлар ассоциациясининг бош котиби Су Чжитсзюн, «Sky Success International Investment Co.» ва «Sky Asia International Investment Limited» компанияси директори Сун Хайфен, «Zhongru Ke Xinda Construction Group Co.» қурилиш компанияси бош директори Гао Сзюнхай сингари 10 дан ортиқ таниқли тадбиркор иштирок этди. 

Тошкент вилояти ҳокимлиги ва «Beijing China sciences runyu environmental technology co ltd» компанияси ўртасида ҳамкорлик меморандуми имзоланди. Унга кўра, Янгийўл шаҳрида қиймати 120 миллион АҚШ доллари бўлган чиқиндини қайта ишлаш заводи қурилиши режалаштирилган. Лойиҳа ишга тушса, кунига 800 тонна чиқинди ёқиш орқали ишлайдиган электр станцияси аҳолига хизмат кўрсатишни бошлайди.

Мазкур лойиҳани келгусида янада кенгайтириб, кунлик қувватини 400 минг тонна чиқиндини зарарсиз ёқиш, электр энергияси ишлаб чиқариш кўзда тутилмоқда. Яратилаётган иш ўрни 150 нафардан ортиқ. Станция тўлиқ қувват билан ишга тушганида, сармоявий миқдори 400 миллион АҚШ долларига етиши кутилмоқда.

Вакилларимиз бугун куннинг иккинчи ярмида Анхой провинцияси Хефей шаҳрига жўнаб кетишди. У ерда ишлаб чиқариш қувватлари билан танишув, савдо-иқтисодий ва сармоявий музокаралар ўтказилиши режалаштирилган.