Тошкент шаҳрида икки Mercedes-Benz автобуси ёниб кетди

Тошкент, Ўзбекистон (UzDaily.uz) — Тошкент шаҳрида бир сутка ичида иккита Mercedes-Benz автобуси ёниб кетди.

Биринчи ёнғин 18 декабрь куни содир бўлган бўлиб, 169-чи маршрутда ҳаракатланувчи автобус Амир Темур шоҳ кўчасида ёниб кетган. Бу ҳақда 21:07 да пойтахт Фавқулодда вазиятлар бошқармаси матбуот хизматига хабар берилган. Иккита ёнғин-қутқарув экипажи тезкорлик билан 21:13 да воқеа жойига етиб борган ва ёнғинни 21:23 да бартараф этган. Ҳодисада жабрланганлар йўқ, аммо автобус жиддий шикастланган.

Иккинчи ёнғин 19 декабрь куни тушга яқин содир бўлган. Янги Сергели ва Қипчоқ кўчалари чорраҳасида 132-чи маршрутда ҳаракатланувчи автобус ёниб кетган. ФВБга 11:51 да хабар берилган ва экипажлар тўрт дақиқа ичида воқеа жойига етиб борган. Ёнғин 11:57 да тўлиқ бартараф этилган. Бу ҳолатда ҳам жабрланиш ҳолатлари қайд этилмаган.

Иккала ҳодиса жамоат транспортининг техник ҳолатига нисбатан жамоатчилик эътиборини оширди.