Тошкент шаҳар ҳокимияти Шавкат Умурзаков номидан очилаётган фейк аккаунтлар ҳақида огоҳлантирди

Тошкент, Ўзбекистон (UzDaily.uz) — Тошкент шаҳар ҳокимияти ижтимоий тармоқларда пойтахт ҳокими Шавкат Умурзаковнинг исми ва суратидан фойдаланиб, фуқароларга мурожаат қилаётган сохта аккаунтлар аниқланганини маълум қилди.

Ҳокимият матбуот хизмати билдиришича, бундай аккаунтларнинг барчаси фирибгарликка тааллуқли бўлиб, ушбу профиллар орқали юборилаётган шахсий мурожаатлар, ёзишмалар ёки сўровлар ҳоким ёки шаҳар маъмурияти ходимларига ҳеч қандай алоқаси йўқ.

Расмий хабарда таъкидланишича, Тошкент шаҳар ҳокими ва ҳокимият мансабдор шахслари фуқароларга шахсий хабарлар орқали мурожаат қилмайди. Ҳар қандай расмий саҳифа ёки алоқа каналлари ҳақидаги маълумотлар олдиндан фақатгина ҳокимиятнинг расмий ахборот ресурслари орқали эълон қилинади.

Фуқаролар бундай аккаунтларга ишонмасликка, улар билан алоқага киришмасликка ва шахсий маълумотларини учинчи шахсларга тақдим этмасликка чақирилди. Шубҳали хабарлар ҳақида зудлик билан тегишли ҳуқуқни муҳофаза қилувчи органларга хабар бериш тавсия этилди.