Тошкент, Ўзбекистон (UzDaily.uz) — Учрашув давомида Шавкат Умурзаков элчи жанобларини янги лавозимга тайинланиши муносабати билан табриклаб, бу тайинлов икки мамлакат ўртасидаги самарали ҳамкорликнинг янги босқичини бошлаб беришига ишонч билдирди. Ҳоким сиёсий мулоқотнинг юқори даражасига қарамасдан, минтақавий даражадаги ҳамкорлик салоҳияти тўлиқ амалга оширилмаганини таъкидлади.

Туризм, соғлиқни сақлаш, маданият ва таълим каби йўналишларда ҳамкорликни фаоллаштириш йўллари таклиф этилди. Икки томонлама муносабатларни мустаҳкамлашнинг асосий воситаси сифатида ахборот алмашиш ва бизнес алоқаларини ривожлантириш масалаларига алоҳида эътибор қаратилди.

Жаноб Вон До Ён, ўз навбатида, сўнгги икки йил ичида Тошкентда содир бўлган ўзгаришларни юқори баҳолаб, Жанубий Корея ишбилармон доираларининг Ўзбекистон бозоридаги фаолиятга бўлган қизиқишини таъкидлади.

Учрашув доирасида меҳмонга йўл инфратузилмаси, энергетика, сув таъминоти, савдо ва хизмат кўрсатиш соҳаларидаги муҳим лойиҳалар ҳақида маълумот тақдим этилди. Янгиҳаёт туманидаги "Янги авлод" махсус иқтисодий зонаси, унинг салоҳияти ва инвесторлар учун яратилган шарт-шароитларга алоҳида эътибор берилди.

Томонлар мулоқотни давом эттириш ва икки халқ манфаатлари йўлида ҳамкорликни мустаҳкамлаш учун янги имкониятларни излашга келишиб олдилар.