Тошкент, Ўзбекистон (UzDaily.uz) — Тошкент — Андижон тўловли автомагистрал қурилиши бўйича тендерда иштирок этиш учун аризалар топшириш муддати бир ойга узайтирилди. Бу ҳақда Ўзбекистон Транспорт вазирлиги хабар берди.

Тендер Иқтисодиёт ва молия вазирлиги ҳамда Автомобиль йўллари қўмитаси томонидан PwC, Arup and Partners ва CMS Cameron McKenna консорциуми кўмагида ўтказилмоқда. Тендерга иштирок этиш учун дастлабки саралаш (Request for Qualification — RFQ) жараёни 2025 йил январь ойида бошланган эди.

Янги муддатга кўра, RFQ топшириш учун охирги сана — 21 май. Тушунтириш сўровлари (clarification request) эса 5 майгача қабул қилинади.

Тендер икки босқичда ўтказилади. Биринчи босқичда иштирокчилар дастлабки саралаш учун ариза топширади. Саралашдан ўтган компаниялар техник ва молиявий таклифларини тақдим этиш учун таклиф қилинади.

Тендер ғолибини 2026 йил апрелида аниқлаш режалаштирилган.

Тошкент — Андижон ўртасидаги тезюрар тўловли автомагистрал қурилиши лойиҳаси 2019 йилдан бери муҳокама қилинаётган эди. Йўлнинг энг муҳим иншоотларидан бири Камчик довони орқали янги тоннел бўлади. Қурилиш 6 йил давомида 3 босқичда амалга оширилади: Тошкент — Ангрен (78 км), Ангрен — Пап (93 км) ва Пап — Андижон (143 км).

Янги трасса бўйлаб қатнов нархи аввалроқ Давлат-хусусий шерикликни ривожлантириш агентлиги томонидан тахминан 5–6 доллар этиб баҳоланган. Транспорт вазири ўринбосари Жасурбек Чўриев 2024 йил Тошкент халқаро инвестиция форумида сўзга чиқиб, лойиҳанинг дастлабки қиймати 4,65 млрд доллар эканини маълум қилган эди. Бироқ, 2024 йил октябрь ойида янгиланган ҳисоб-китобга кўра, бу кўрсаткич 4,28 млрд долларга туширилган.