Тошкент, Ўзбекистон (UzDaily.uz) — “Uzbekistan Airports” компанияси Тошкент халқаро аэропортининг учиб кетиш ва учиб келиш заллари, шунингдек, терминал олди ҳудудида жойлашган майдонларни ижарага бериш учун E-auksion.uz электрон платформасига тегишли лотларни жойлаштирди.

Хусусан, тез кунларда пойтахт аэропортининг маҳаллий авиақатновлар терминалида китоб дўкони ташкил этилиши режалаштирилмоқда. Ушбу дўкон учун 20 кв.м майдон аукционга қўйилади. Лотнинг йиллик бошланғич қиймати 48 миллион сўм этиб белгиланди.

Халқаро авиақатновлар терминалининг учиб кетиш залида автоматлаштирилган юкларни сақлаш жойини ташкил этиш учун 8 кв.м майдон аукционга жойлаштирилган. Лотнинг бошланғич баҳоси – йилига 144 миллион сўм.

Шунингдек, учиб кетиш залининг шаҳарга қараган террасасида янги кафе ташкил этиш кўзда тутилган. Ушбу кафе майдони 50 кв.м ташкил этади ва унинг бошланғич баҳоси йилига 300 миллион сўм этиб белгиланган.

Халқаро авиақатновлар терминалининг учиб келиш залида маҳаллий уяли алоқа операторларининг СИМ-карталарини сотиш шохобчасини ташкил этиш учун ҳам 5 кв.м майдон ким ошди савдосига қўйилди. Лотнинг дастлабки қиймати – йилига 90 миллион сўмни ташкил этади.

Шунингдек, терминал олди ҳудудида банкоматлар учун бошланғич қиймати йилига 36 миллион сўм бўлган 6 кв.м жой ва ҳар бири 14 кв.м бўлган "FOOD-TRACK" шаклидаги иккита умумий овқатланиш шохобчаси учун лотлар жойланган. Умумий овқатланиш шохобчаларининг ҳар бири учун йиллик бошланғич қиймат – 100,8 миллион сўм этиб белгиланган.

Бундан ташқари, E-аукцион.уз электрон платформасида аэропортнинг асосий ҳудудида перронга чиқиш имкониятига эга майдонларни ижарага бериш учун лотлар жойлаштирган. Жумладан, ҳар бирининг майдони 40 кв.м, бошланғич баҳоси йилига 192 миллион сўм этиб белгиланган авиакомпания офисларини жойлаштириш учун майдонлар мавжуд.

Ушбу аукционлар 2025 йил 6 январь куни E-auksion.uz электрон платформасида бўлиб ўтади. Эслатиб ўтамиз, аукционда иштирок этувчи компаниялар техник шартларга мос келишлари шарт. Ҳар бир лот бўйича ижарачиларга қўйиладиган талаблар ва бошланғич нархлар E-auksion.uz веб-сайтида мавжуд. Ким ошди савдоси қоидаларига кўра, дастлабки йиллик суммалар ким ошди савдоси пайтида камида 10% га ошиши мумкин.