Тошкент, Ўзбекистон (UzDaily.uz) — Тожикистонлик тадбиркор Ҳайриддин Бобоев ўз маблағлари ҳисобидан Фарғона вилоятининг Бешариқ туманида суюлтирилган газни сақлаш омборини қуришга тайёрлигини билдирди.

Лойиҳанинг амалга оширилиш истиқболлари Фарғона вилояти ҳокими Ҳайрулла Бозоров ва тадбиркор ўртасидаги учрашувда муҳокама қилинди.

Ҳайриддин Бобоев омборнинг 2 минг тонна ҳажмда қурилишини режалаштираётганини маълум қилди. Бу лойиҳа автотранспорт, ижтимоий муассасалар ва маҳаллий аҳоли эҳтиёжлари учун суюлтирилган газни барқарор етказиб беришни ташкил қилиш имконини беради.

Ҳамкорликнинг кейинги босқичлари, жумладан, қурилиш учун оптимал ҳудудни танлаш ва аниқ таклифларни ишлаб чиқиш, ҳудуднинг тегишли инспекцияси ўтказилгандан сўнг белгиланади.