Тошкент, Ўзбекистон (UzDaily.uz) — БАА аэропортларида ўзбек фуқароларининг 5–8 соатлаб текширувдан ўтишга мажбур бўлаётгани ва айрим ҳолларда уларга кириш рад этилаётгани ҳақида хабарлар тарқалди.

Ўзбекистон Республикаси Ташқи ишлар вазирлиги матбуот котиби Ахрор Бурханов ушбу ҳолат юзасидан ўзининг Telegram-каналида изоҳ берди. Унинг таъкидлашича, БАА аэропортларида хорижий фуқаролар, жумладан, ўзбекистонликлар узоқ муддатли текширувдан ўтказилмоқда. «Бизнинг томонимиздан ушбу ҳолат юзасидан махсус мониторинг олиб борилмоқда», — дея таъкидлади у.

Унинг сўзларига кўра, ҳозирда ўзбек фуқароларининг қонуний ҳуқуқ ва манфаатларини ҳимоя қилиш учун зарур чоралар кўрилмоқда. Ўзбекистоннинг Абу-Дабидаги элчихонаси ва Дубайдаги Бош консулхонаси ушбу муаммони бартараф этиш мақсадида БАА расмийлари билан тегишли музокаралар ўтказди ва доимий алоқада бўлиб турибди.

Ахрор Бурханов таъкидлаганидек, текширув вақтларининг ортиши мамлакатдаги бир қатор халқаро тадбирлар билан боғлиқ хавфсизлик чораларининг кучайтирилиши натижасидир. Шу билан бирга, мавжуд ресурслардан тўлиқ фойдаланилган ҳолда назорат жараёнлари тезлаштирилмоқда ва айни пайтда ўзбек фуқаролари БААга катта кечикишларсиз кириб келмоқда.