Темур Кападзе IFFHS талқинига кўра дунё миллий терма жамоалари мураббийлари орасида топ-10 таликка кирди

Тошкент, Ўзбекистон (UzDaily.uz) — Ўзбекистон миллий терма жамоасининг собиқ бош мураббийи Темур Кападзе Халқаро футбол тарихи ва статистикаси федерацияси (IFFHS) талқинига кўра 2025 йилда дунё миллий терма жамоалари мураббийлари орасида энг яхшилар ўнталигига киритилди.

IFFHS овоз бериш якунларига кўра, Кападзе 10 очко тўплаб саккизинчи ўринни эгаллади. Бу кўрсаткич Колумбия терма жамоаси бош мураббийи Нестор Лоренсонинг натижаси билан тенг.

Рейтингда биринчи ўринни Испания терма жамоаси мураббийи Луис де ла Фуэнте эгаллади. Иккинчи ўрин Португалия терма жамоаси бош мураббийи Роберто Мартинесга, учинчи ўрин эса аргентиналик Лионель Скалонига насиб этди.

Шунингдек, биринчи ўнликка Столе Солбаккен (Норвегия, 4-ўрин), Томас Тухель (Англия, 5-ўрин), Дидье Дешам (Франция), Валид Реграги (Марокаш) ва Хавьер Агирре (Мексика, 10-ўрин) ҳам кирди.

Эслатиб ўтамиз, Темур Кападзе 2025 йил декабр ойи бошида Наманганнинг «Навбаҳор» клуби бош мураббийи этиб тайинланган эди.