Тошкент, Ўзбекистон (UzDaily.uz) — Эрон Ташқи ишлар вазири Аббос Аракчий АҚШ Президенти Дональд Трампнинг Теҳрон ва Тел-Авив ўртасида гўёки ўт очишни тўхтатиш бўйича келишувга эришилгани ҳақидаги баёнотини рад этди.

Ўзининг X (аввалги Twitter) ижтимоий тармоғидаги саҳифасида эълон қилинган баёнотида Аракчий ҳозирги вақтда ҳеч қандай расмий сулҳ ёки ҳарбий ҳаракатларни тўхтатиш бўйича келишув мавжуд эмаслигини таъкидлади.

Унинг айтишича, Эрон томони фақатгина Исроилнинг тажовузкор ҳаракатлари зудлик билан тўхтатилган тақдирдагина жавоб зарбаларини тўхтатишга тайёр.

«Агар Исроил режими Эрон халқига нисбатан ноқонуний тажовузини Теҳрон вақти билан соат 4:00 дан кечикмай тўхтатса, биз жавоб чора-тадбирларини давом эттирмаймиз», — деди Аракчий.

Шу билан бирга, ТИВ раҳбари ҳарбий операцияларни тўхтатиш бўйича ҳозирча якуний қарор қабул қилинмаганини ҳам қўшимча қилди.

Кейинроқ у маълум қилдики, Эрон қуролли кучлари белгиланган муддат — Теҳрон вақти билан соат 4:00 гача ҳарбий ҳаракатларни давом эттирган.

Бу баёнотлар Дональд Трамп бир неча соат аввал берган ва Исроил ҳамда Эрон ўртасида гўёки 12 кунлик қуролли тўқнашувни расман тугатишга олиб келадиган сулҳ келишуви тузилганини иддао қилган баёноти ортидан янгради.