Тошкент, Ўзбекистон (UzDaily.uz) — TBC Uzbekistan рақамли банкинг экотизими тўлиқ рақамли банклар (необанклар) тоифасида дунёнинг етакчи финтеч компаниялари рўйхатига кирди. TBC ушбу рейтингга киритилган Ўзбекистон ва Марказий Осиёдаги ушбу соҳанинг биринчи вакили бўлди.

CNBC ва Statista томонидан тузилган дунёнинг етакчи финтех компанияси рейтинги — соҳадаги муҳим мезонлардан биридир. Рейтинг компанияларнинг асосий молиявий ва операцион кўрсаткичлари, жумладан, тушум, даромадлилик, мижозлар базасининг ҳажми, кредит ва депозит портфелларининг ўсиш суръати, транзакциялар ҳажми, бозор улуши, ходимлар сони каби бир қатор омилларнинг ҳар томонлама таҳлили асосида шакллантирилади. 

TBC Uzbekistan'нинг дунёдаги етакчи необанклар қаторига киритилиши компаниянинг жадал ўсиши ва юқори рентабеллигини, шунингдек, Ўзбекистон бозорида илғор рақамли молиявий хизматларни ривожлантиришда етакчи эканлигини акс эттиради.

Ника Курдиани, СEО TBC Uzbekistan:
“2025 йилда Ўзбекистон ва Марказий Осиёдан етакчи финтеч компанияларининг дунёнинг рейтингига кирган илк финтех компанияси бўлиш – биз учун катта шараф. Бу динамик ва даромадли ўсишни узлуксиз инновациялар билан уйғунлаштирган стратегиямиз самарадорлигининг эътирофидир.

Ўзбекистон — дунёдаги энг истиқболли ва жадал ривожланаётган рақамли молиявий хизматлар бозорларидан бири. Биз бу ерда янги стандартларни белгилаб, бутун соҳа учун маррани янада юқорига кўтараётганимиздан фахрланамиз. CNBC томонидан билдирилган эътироф нафақат TBCнинг муваффақиятларини, балки Ўзбекистон молия бозорининг тез суръатларда ривожланаётганини ҳам кўрсатади.

Бу биз учун фақат бошланиши. Олдинда бизни экотизимни кенгайтириш ва инновацион маҳсулотларни ишга тушириш кутмоқда”.

TBC Uzbekistan кенг қамровли рақамли экотизимни ривожлантириб, молиявий ва лайфстайл хизматлар қамровини ҳамда маҳсулотлар қаторини босқичма-босқич кенгайтирмоқда. Ўтган йил давомида компания бир қатор янги маҳсулотларни, жумладан, кундалик тўловлар учун флагман Salom Card дебет картаси, Osmon Card кредит картаси, TBC Business бизнес-банкинг ва кредитлаш хизмати, шунингдек, TBC Sug‘urta суғурта компанияси каби тўлиқ рақамли хизматларни ишга туширди ва кенгайтирди.

2025 йил июнь ойида TBC Uzbekistan чакана савдо учун етакчи ечимларни таклиф қилувчи Ўзбекистондаги етакчи SaaS платформаси бўлган BILL платформасининг назорат пакетини харид қилиб, стратегик аҳамиятга эга бўлган кичик ва ўрта бизнес сегментида компания мавқеини мустаҳкамлади.