ТBC Узбекистан беш йиллик фаолиятининг якунларини сарҳисоб қилмоқда

Тошкент, Ўзбекистон (UzDaily.uz) — 2019 йилда TBC Bank Group пайме тўлов хизматининг назорат пакетини сотиб олиб, Ўзбекистон бозорига кирди. 2020 йил октябрь ойида TBC Bank ишга туширилиши билан TBC Uzbekistan экотизими шакллана бошлади. Бугунги кунда ушбу экотизим таркибига TBC Nasiya бўлиб тўлаш хизмати, TBC Sug‘urta суғурта компанияси ва BILLZ — чакана савдони автоматлаштириш хизмати киради.

Беш йил давомида компания бозордаги ўз позициясини сезиларли даражада мустаҳкамлади, жамоасини кенгайтирди, инновацион технологик ечимларни ишга туширди ва Марказий Осиёда рақамли банк хизматлари соҳасининг етакчиларидан бирига айланди.

TBC Uzbekistan ҳар йили асосий молиявий кўрсаткичларда ўсишни намойиш этиб, бизнесни кенгайтириш билан бирга мамлакат иқтисодиётига сармоя киритишда давом этмоқда — TBC Bank Group ва унинг ҳамкорлари Ўзбекистон иқтисодиётига 460 млн АҚШ долларидан ортиқ маблағ киритган.

2025 йилнинг иккинчи чораги якунига кўра, 21 млн ноёб фойдаланувчи ўз молиясини TBC Uzbekistan экотизимига ишониб топширган — бу эса мамлакат аҳолининг ярмидан кўпроғини ташкил этади. Беш йил давомида мижозлар 2,3 млн омонат ҳисоб рақамларини очиб, жами 2,9 млрд АҚШ долларидан ортиқ маблағни жамғаришган. Бугунги кунда TBC Bank мамлакатдаги жисмоний шахслар омонатларининг 4,1%ини ўзида жамлаган.

2020 йил октябрдан буён 5,6 млн банк картаси чиқарилган. Банкнинг флагман дебет маҳсулоти — Salom Card, унда ҳамкорлардан қилинган харидлар учун 5% кешбек ва ҳисобдаги қолдиққа фоизлар тақдим этилади. 2024 йил декабрдан 2025 йил сентябргача жами 980 мингта Salom Card мижозлар томонидан буюртма қилинган.

2024 йилнинг охирида TBC Uzbekistan мамлакатдаги кичик ва ўрта бизнес субъектлари учун мўлжалланган илк тўлиқ рақамли платформа — TBC Business’ни тақдим этди. Платформа орқали тадбиркорлар учун ҳисоб рақамларини очиш, молияни бошқариш воситаларидан фойдаланиш ҳамда кредитлаш имкониятларини ўз ичига олади.

2025 йилда TBC Uzbekistan экотизими янада кенгайди:

— март ойида TBC Sug‘urta суғурта компанияси лицензия олиб, ўз фаолиятини бошлади. Йилнинг иккинчи чорагида мижозлар 145 мингдан ортиқ суғурта полиси расмийлаштиришди, суғурта мукофотлари ҳажми эса 3 млн АҚШ долларидан ошди;
— июнь ойида чакана савдо учун мўлжалланган BILLZ SaaS-платформаси улуши харид қилингани ҳақида эълон қилинди. BILLZ билан интеграция ТBC'нинг B2B йўналишини мустаҳкамлаб, банк ва финтех ечимларини кредитга алоқадор бўлмаган янги рақамли хизматлар билан бойитди. Мазкур битим мамлакат стартап экотизими тарихидаги энг йириклардан бири бўлди.

Беш йил ичида пайме фойдаланувчиларнинг кундалик ҳаётининг ажралмас қисмига айланди — илова орқали ҳисобларни тўлаш, йўл ҳақи ва чипталарни харид қилиш, ҳатто хайрия лойиҳаларига ҳисса қўшиш мумкин. Бренд Тошкентда топ-оф-минд даражаси бўйича учинчи ўриндан биринчи ўринга кўтарилди ва бутун Ўзбекистон бўйлаб ёш аудитория орасида 73% таниқлиликка эришиб, мамлакатдаги энг оммабоп ва талабгир тўлов иловаси мақомини мустаҳкамлади.

TBC Uzbekistan ўз фаолиятининг бошиданоқ корпоратив ижтимоий масъулият (CSR) дастурини амалга ошириб, технологиялар, маданият ва ижтимоий ташаббуслар мижозлар ва жамият учун қўшимча қиймат яратадиган муҳитни шакллантирмоқда. ТBC учун CSR лойиҳаларининг устувор йўналишлари қуйидагиларни ўз ичига олади:

 — молиявий саводхонликни ошириш;

 — маданий меросни асраб-авайлаш;

 — ижтимоий ташаббусларни қўллаб-қувватлаш;

 — аёлларни тадбиркорлик ва технологиялар соҳасида қўллаб-қувватлаш;

 — атроф-муҳитни муҳофаза қилиш ва шаҳарларни ободонлаштириш.

2024 йил бошидан буён TBC Uzbekistan сунъий интеллект йўналишига 15 млн АҚШ доллари миқдорида инвестиция киритиб, ўзининг АI-платформасини шакллантирди. Унга нутқ технологиялари (ўзбек ва рус тиллари учун нутқни таниш ва синтез қилиш) ҳамда банк соҳасига мослаштирилган икки тилли катта тил модели (LLM) киради. Бу хизматларни сифатни пасайтирмасдан кенгайтириш, мижозларнинг юқори ишонч даражасини сақлаб қолиш ва одатий операциялар бўйича харажатларни камайтириш имконини берди. Лойиҳа ишга туширилганидан ярим йил ўтиб, ушбу технологиялар асосида яратилган АI-агентлар мижозларга кредит тўлови бўйича эслатма учун қилинган қўнғироқларнинг 90 фоизини автоматик қайта ишламоқда ҳамда сотув ва қўллаб-қувватлаш жамоаларига кўмак бермоқда.

TBC Uzbekistan жамоаси 28 та миллат вакилларидан иборат 4 100 дан ортиқ мутахассисни ўзида жамлаган бўлиб, улар Тошкент, Тбилиси ва Олмаотадаги учта асосий хабда фаолият юритади. Кўп миллатли жамоа турли мамлакатларнинг финтех соҳасидаги илғор тажрибаларини жалб қилиш имконини беради. Иш унумдорлигини сақлаб қолиш учун компания жамоани ривожлантириш, соғлиқни сақлаш дастурлари ва офис муҳитини яхшилашга доимий равишда сармоя киритади.

“Биз беш йил ичида амбицияли стартапдан Марказий Осиёдаги етакчи рақамли банк экотизимигача бўлган йўлни босиб ўтганимиздан фахрланамиз. Технологиялар ва инновацион ечимлар орқали биз рақамли молияни янги босқичга олиб чиқиб, кундалик ҳаётда фойдали молиявий одатларни шакллантирмоқдамиз ҳамда бозорга сезиларли қиймат таклиф этмоқдамиз. Бизнесдаги ютуқларимиз — мамлакат аҳолисининг ярмидан кўпи томонидан билдирилган ишончнинг ифодасидир.

Беш йил давомида биз яшаётган ва компания сифатида ривожланаётган жамиятга масъулият билан ёндашувчи, умумий қадриятлар асосида бирлашган профессионал жамоани шакллантирдик. Бугунги мақсадимиз — инновацияларни илгари суриш, ижтимоий ва маданий ташаббусларни қўллаб-қувватлаш ҳамда орттирган тажрибамиз билан ўртоқлашиш орқали Ўзбекистон тараққиётига ҳисса қўшишдир. Биз бундан кейин ҳам ўз сервисларимиз экотизимини ривожлантириш, жамиятни қўллаб-қувватлаш ва мамлакатда рақамли молиянинг келажагини шакллантиришда давом этамиз”, — деди CEO TBC Uzbekistan, Ника Курдиани.

Беш йил ичида TBC Uzbekistan янги иштирокчидан Ўзбекистон ва Марказий Осиё молия бозорининг етакчиларидан бирига айланди. Иқтисодиётга сармоя киритиш, иш ўринлари яратиш ва инновацияларни жорий этиш орқали компания мамлакатда барқарор ўсиш учун мустаҳкам пойдевор яратди. Экотизим эса Ўзбекистоннинг рақамли трансформациясига ҳисса қўшишда ва миллионлаб фойдаланувчиларнинг ҳаёт сифатини оширишда давом этмоқда.