Тошкент, Ўзбекистон (UzDaily.uz) — Мажлисда депутатлар тадбиркорлик субъектлари айнан бир ҳуқуқбузарлик учун бир неча маротаба жавобгарликка тортилишининг олдини олишга қаратилган қонун лойиҳасини иккинчи ўқишда кўриб чиқдилар.

Ушбу қонун лойиҳаси билан Маъмурий жавобгарлик тўғрисидаги ва Солиқ кодексларига шахснинг содир этган айнан бир ҳуқуқбузарлик учун бир маротаба жавобгарликка тортилишини таъминлаш ва солиқ маъмуриятчилигининг янада такомиллаштирилишига қаратилган тегишли ўзгартириш ва қўшимчалар киритилмоқда.

Таъкидланганидек, қонун лойиҳасини иккинчи ўқишга тайёрлаш жараёнида масъул қўмита томонидан бир қатор йиғилишлар, семинарлар ўтказилди. Уларда депутатлар томонидан уни биринчи ўқишда муҳокама қилиш чоғида берилган кўплаб таклифлар, фикр-мулоҳазалар чуқур таҳлил қилинди ва уларнинг аксарияти ҳужжат матнида акс этди.

Тадбиркорларни қўллаб-қувватлаш ва уларга қулай шароитлар яратиш бўйича берилган таклиф инобатга олиниб, қонун лойиҳаси маромига етказилди.

Мунозаралар давомида солиқ маъмуриятчилигини янада такомиллаштириш, солиққа оид ҳуқуқбузарликлар учун белгиланган жавобгарлик чоралари, шу жумладан молиявий санкциялар ва маъмурий жарималар қўллашнинг тадбиркорлик субъектлари учун салбий оқибатлар келтириб чиқармаслигига оид нормаларга алоҳида эътибор қаратилди. Лойиҳадаги солиқ имтиёзларини тақдим қилишга оид масалалар депутатлар томонидан маъқулланди.

Қонун лойиҳасининг қабул қилиниши солиққа оид ҳуқуқбузарликлар учун жавобгарликни либераллаштириш, ортиқча оворагарчиликларнинг олдини олиш, тадбиркорлик субъектлари олдидаги мажбуриятларни камайтириш, уларнинг айланма маблағларини бизнесни ривожлантиришга йўналтиришга хизмат қилади.

Қонун лойиҳаси депутатлар томонидан иккинчи ўқишда қабул қилинди.