Тадбиркорларнинг ортиқча сарсон бўлишига сабаб бўлувчи айрим нормалар тартибга солинди

Тошкент, Ўзбекистон (UzDaily.uz)  — Қонун билан айрим қонун ҳужжатларига ўзгартириш ва қўшимчалар киритилди.

Киритилган ўзгартиришларга кўра, давлат ўрмон хўжалиги органлари ўрмон фондининг фойдаланилмаётган ерлари жисмоний ва юридик шахсларга электрон онлайн-аукцион орқали ижара ҳуқуқи асосида бериши мумкинлиги белгиланди.

Иқтисодий процессуал кодексга киритилган ўзгартиришларга кўра, тадбиркорлик фаолиятининг айрим турлари билан шуғулланиш учун лицензия (рухсатнома)ларнинг амал қилиши 10 кундан ортиқ, лекин 6 ойдан кўп бўлмаган муддатга тўхтатиб турилиши мумкинлиги белгиланди.

Илгари мазкур лицензияларнинг амал қилишини 10 иш кунидан кўп бўлган муддатга тўхтатиб турилиши белгиланган эди.

Шунингдек, “Аҳоли бандлиги тўғрисида”ги Қонунга киритилган ўзгартиришларга кўра, ўзини ўзи банд қилган шахслар БҲМнинг камида 1 баравари миқдорида ихтиёрий тартибда ижтимоий солиқ тўлаши белгиланди.

Илгари ушбу Қонунда мазкур солиқ БҲМнинг 50 фоизидан кам бўлмаган миқдорда белгиланган эди.