Тошкент, Ўзбекистон (UzDaily.uz) — Ер ости сув ресурсларини муҳофаза қилиш соҳасини такомиллаштиришга қаратилган қонун лойиҳаси иккинчи ўқишда моддама-модда кўриб чиқилди.

Ушбу лойиҳа ер ости сувларидан ноқонуний фойдаланиш ҳолатларининг олдини олишга, ер ости сувлари учун қудуқлар ковлаш фаолияти билан шуғулланувчи тадбиркорлик субъектлари учун енгилликлар яратишга қаратилган.

Қонун лойиҳаси билан Маъмурий жавобгарлик тўғрисидаги ҳамда Солиқ кодексларига, “Сув ва сувдан фойдаланиш тўғрисида”ги, “Лицензиялаш, рухсат бериш ва хабардор қилиш тартиб-таомиллари тўғрисида”ги қонунларга ўзгартириш ва қўшимчалар киритилмоқда.

Яъни, ер ости сувлари қудуқларини қонунга хилоф равишда бурғулаш ва хавфли геологик жараёнларнинг олдини олишга доир кўрсатмалар талабларини бажармаганлик учун жавобгарлик белгилаш, ҳисоблаш воситаларисиз ер ости сувлари олинганда солиқни белгиланган солиқ ставкасининг оширилган миқдорида ундириш, ер ости сувларига қудуқларни бурғилашга доир рухсатнома бериш тартибини ер ости сувларига қудуқларни бурғилаш фаолиятига доир рухсатномани бериш тартиб-таомили билан алмаштириш назарда тутилмоқда.

Мажлисда депутатлар томонидан лойиҳа юзасидан фикр-мулоҳазалар билдирилди. Айрим меъёрларни қайтадан кўриб чиқиш ва маромига етказиш учун қонун лойиҳаси масъул қўмитага қайтарилди.