Сурхондарё вилоятида эркак экстремистик материалга “лайк” босгани учун уч йил озодликдан маҳрум этилди

Тошкент, Ўзбекистон (UzDaily.uz) — Сурхондарё вилоятида бир фуқаро олти йил муқаддам ижтимоий тармоқда тақиқланган материалга “лайк” босгани учун уч йил озодликдан маҳрум этилди. Бу ҳақда вилоят судларининг расмий Telegram-каналида хабар берилди.

Аниқланишича, судланувчи У. Алмарданов ўзининг “Redmi Note 13” русумли телефон аппаратига ўрнатилган “Odnoklassniki.ru” мессенжерига очилган “Ulugbek Almardanov” номли аккаунтидаги “Класс босилганлар” бўлимида 2019 йилда Абдуғани Умаров (Абдуллоҳ домла)нинг “Жаннатга ошиқлар” номли ақидапарастлик ғоялари билан йўғрилган маърузасига “класс” босиш орқали виртуал дўстларига тарқатган. Бу билан у амалдаги Жиноят кодекси 244-1-моддаси 3-қисмининг “г” бандида назарда тутилган жиноятни содир этган.

Жиноят ишлари бўйича Қумқўрғон туман судининг 2025 йил 1 июлдаги ҳукмига кўра, У. Алмарданов Жиноят кодекси 244-1-моддаси 3-қисмининг “г” бандида назарда тутилган жиноятни содир қилганликда айбли деб топилиб, шу модда билан унга Жиноят кодексининг 57-моддаси қўлланилиб, 3 йил муддатга озодликдан маҳрум қилиш жазоси тайинланган ва жазони умумий тартибли колонияларда ўташ белгиланган.

Судланувчи У. Алмарданов томонидан содир этилган мазкур жиноят оғир турга мансублиги туфайли унга нисбатан озодликдан маҳрум қилиш билан боғлиқ бўлган жазо тайинланган. Шундай бўлсада жазони енгиллаштирувчи ҳолатларни инобатга олган ҳолда унга Жиноят кодексининг 57-моддаси татбиқ этилиб, модда санкциясидан камроқ жазо муддати тайинланган.

Аввалроқ экстремистик ва террористик ғояларни ўз ичига олган материаллар рўйхатининг янгиланган шакли эълон қилинган эди. 2018 йил 30 июлда қабул қилинган “Экстремизмга қарши курашиш тўғрисида”ги қонунга мувофиқ, Ўзбекистон ҳудудида бундай материаллар, уларнинг атрибутлари ва белгиларини кўрсатиш, тайёрлаш, сақлаш, тарқатиш ва намойиш этиш, шунингдек, ОАВ, телекоммуникация тармоқлари ва интернет орқали кўрсатиш қатъий тақиқланган.