Валюта курслари 29/08/2025
$1 – 12482.38
UZS – 0.56%
€1 – 14540.72
UZS – 1.07%
₽1 – 155.23
UZS – 0.62%
Қидириш
Иқтисод 20/02/2025 “SUEZ Group” делегацияси билан учрашув бўлиб ўтди

“SUEZ Group” делегацияси билан учрашув бўлиб ўтди

Тошкент, Ўзбекистон (UzDaily.uz) — Жорий йилнинг 19 февраль куни Ўзбекистон Республикаси Бош вазири ўринбосари — Иқтисодиёт ва молия вазири Жамшид Қўчқоров “SUEZ Group” компаниясининг бош ижрочи директори Пер Полиак билан учрашди.

Учрашувда Франция делегацияси таркибида Франциянинг Ўзбекистондаги Фавқулодда ва Мухтор элчиси Орелия Бушез, SUEZ компаниясининг Европа ва Марказий Осиё бўйича бош ижрочи директори Пол Бурдиён, Марказий Осиё ва Кавказ бўйича бош ижрочи директори Силвер Делоне ҳамда компаниянинг бошқа вакиллари иштирок этди. 

Ўзбекистон томонидан музокараларда Иқтисодиёт ва молия вазири ўринбосари Илхомжон Умрзаков, «Ўзсувтаъминот» АЖ бошқаруви раиси вазифасини бажарувчи Аҳмад Сувонқулов ва вазирликнинг бошқа вакиллари қатнашди. 

Учрашувда қуйидаги масалалар муҳокама этилди: 

• Сув таъминоти инфратузилмасини модернизацияқилиш — Ўзбекистонда сув таъминоти ва оқова сувларни тозалашни яхшилашга қаратилган лойиҳалар, шу жумладан Сурхондарё вилоятидаги давлат-хусусий шериклик лойиҳаси, Тошкент шаҳрининг сув таъминотини модернизациаси бўйича муҳокамалар бўлиб ўтди. Томонлар мамлакатда сув ресурслари сифатини ошириш учун инновацион технологиялар ва барқарор ечимларни жорий этиш муҳимлигини таъкидлади.

• Сув таъминоти соҳасидаги таълим дастурлари — Тошкент ирригация ва қишлоқ хўжалигини механизациялаш муҳандислари институти талабалари учун ўқув дастурлари орқали сув таъминоти тармоқларига юқори малакали мутахассислар тайёрлаш борасидаги истиқболли ҳамкорлик масалалари муҳокама этилди. 

Томонлар ичимлик суви таъминоти, оқова сувларни чиқариш ва сув ресурсларини бошқариш соҳаларида самарали ҳамкорликни давом эттириш, шунингдек, минтақанинг барқарор ривожланиши ҳамда экологик хавфсизлигини таъминлашга қаратилган лойиҳаларни ривожлантириш ниятини билдирди. 

Энг сўнгги янгиликлардан хабардор бўлинг
Телеграм каналимизга обуна бўлинг