Тошкент, Ўзбекистон (UzDaily.uz) — Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси рекламалар тўғрисидаги қонунчиликни такроран бузганлиги учун MO'JIZA HONEYMOON МЧЖ раҳбарини жавобгарликка тортишни таъминлади.

Аввал хабар берилганидек, Рақобат қўмитаси Фарғона вилояти ҳудудий бошқармасининг Махсус комиссияси томонидан! “Реклама тўғрисида”ги Қонун талабларини бузган “MO'JIZA HONEYMOON” МЧЖга нисбатан иш қўзғатиб, натижада молиявий  жарима қўлланилганди.

 Бироқ, қонунбузилиш ҳолатини бартараф этиш ва келгусида йўл қўймаслик юзасидан  “MO'JIZA HONEYMOON” МЧЖ раҳбарига берилган кўрсатма ижроси таъминланмаган ва ушбу рекламалар берилиши давом этганлиги ҳолати аниқланган.

Юқоридаги ҳолат юзасидан ҳудудий бошқарманинг Махсус комиссияси томонидан қайта қонунбузилишга йўл қўйгани учун “MO'JIZA HONEYMOON” МЧЖ раҳбарига нисбатан маъмурий чора қўллаш юзасидан маълумотлар тегишли судга юборилиб, суднинг ҳал қилув қарори билан маъмурий жавобгарлик тайинланди.

Қўмита тадбиркорларга қонунбузилиш ҳолатларини бартараф этиш ва келгусида йўл қўймаслик юзасидан қарор ва кўрсатмалари ижросини лозим даражада бажармаганлик учун маъмурий жавобгарлик белгилангандан сўнг давом эттирилса жиноий жавобгарликка олиб келиши мумкинлиги таъкидланди.