Суд ишларини соддалаштирилган тартибда кўриб чиқиш имкониятлари кенгаяди

Тошкент, Ўзбекистон (UzDaily.uz) — Мажлисда фуқаролик ва иқтисодий суд ишларини соддалаштирилган тартибда кўриб чиқиш имкониятларини кенгайтиришга қаратилган қонун лойиҳаси биринчи ўқишда муҳокама қилинди.

Ушбу қонун лойиҳаси суд ишларини кўриб чиқиш муддатларини қисқартириш ва иқтисодий фаолиятнинг самарадорлигини оширишга қаратилган.

У билан Фуқаролик процессуал ҳамда Иқтисодий процессуал кодексларига фуқаролик ва иқтисодий суд ишларини соддалаштирилган тартибида кўриб чиқишга асос бўлувчи даъво миқдорини ошириш бўйича ўзгартиришлар киритилмоқда.

Амалдаги қонунчиликка кўра, даъво баҳоси нисбатан кичик бўлган ишлар, жумладан, жисмоний шахсларга нисбатан БҲМнинг беш баравари, якка тартибдаги тадбиркорларга нисбатан БҲМнинг ўн баравари, юридик шахсларга нисбатан БҲМнинг йигирма баравари миқдоридаги низолар соддалаштирилган иш юритиш тартибида кўриб чиқилади.

Қонун лойиҳаси билан соддалаштирилган тартибида кўриладиган иш бўйича даъвонинг максимал баҳоси фуқаролик низолари бўйича юридик шахсларга нисбатан — БҲМнинг 150 баравари, якка тартибдаги тадбиркорларга — БҲМнинг 100 баравари, жисмоний шахсларга — БҲМнинг 50 баравари, иқисодий низолар бўйича эса юридик шахсларга нисбатан — БҲМнинг 150 баравари, якка тартибдаги тадбиркорларга — БҲМнинг 100 баравари этиб белгиланмоқда. Бу ўзгаришлар натижасида кўплаб фуқаролик ва иқтисодий низолар судда тезкор ҳал этилади, суд қарорлари эса одатдагидан тезроқ қонуний кучга киради.

Мажлисда қайд этилганидек, қонун лойиҳасининг қабул қилиниши умумий тартибда кўрилаётган ишларнинг аксарият қисми соддалаштирилган тартибда кўрилиши ва бу ишлар бўйича суд қарорларининг кучга кириш муддати 30 кундан 10 кунга қисқариши натижасида банклар балансидаги ҳаракатсиз ва муаммоли активлар улуши камаяди ҳамда иқтисодий низолар тезроқ ҳал этилади. Шу билан бирга, суд тизимидаги юклама камайиб, банклар ва тадбиркорлик субъектлари учун молиявий барқарорлик таъминланади.

Қонун лойиҳаси депутатлар томонидан иккинчи ўқишда қабул қилинди.