Тошкент, Ўзбекистон (UzDaily.uz) — Стратегик ислоҳотлар агентлигида Агентлик директори Баходир Рахматов ва Халқаро Маслаҳатчилар Кенгаши аъзолари Алфред Гузенбауэр, Александр Квасневский ва Штефан Фюле ўртасида учрашув бўлиб ўтди.

Учрашув давомида ХМКнинг 2024 йилдаги фаолияти якунлари кўриб чиқилди ҳамда асосий соҳаларда ислоҳотларни янада такомиллаштиришга қаратилган қўшма "йўл харитаси" муҳокама қилинди.

Муҳокама давомида 2025 йилда ҳамкорликнинг янги йўналишларига алоҳида эътибор қаратилди. Хусусан, жорий йилда ХМК билан биргаликда Европа давлатларининг етакчи олий таълим муассасалари билан ҳамкорликни йўлга қўйиш, савдо-иқтисодий ва маданий-гуманитар соҳаларда алоқаларни мустаҳкамлаш, шунингдек, Австрия, Полша ва Чехия тажрибаси асосида ҳудудий ривожланиш бўйича комплекс ёндашув ишлаб чиқиш режалаштирилмоқда.

Учрашувда халқ фаровонлигини ошириш ва барқарор иқтисодий ўсишни таъминлаш учун илғор халқаро тажрибаларни миллий шароитга мослаштириш муҳимлиги таъкидланди.

Учрашув якунида томонлар самарали ҳамкорликни давом эттиришга ишонч билдирдилар ва иқтисодиёт ҳамда ижтимоий соҳаларни модернизация қилиш ва ривожлантиришга қаратилган ташаббусларни амалга оширишга келишдилар.