Тошкент, Ўзбекистон (UzDaily.uz) — Соғлиқни сақлаш вазири Асилбек Худаяров Бутунжаҳон гемофилия федерацияси ва Бутунроссия гемофилия жамияти вакиллари билан учрашди.

Мулоқотда таъкидланганидек, Ўзбекистон кейинги йилларда туғма ирсий хасталик — гемофилияни ташхислаш, даволаш ва унинг олдини олиш борасида қатор халқаро ташкилотлар билан ҳамкорлик қиляпти. Жумладан, мутахассисларимиз бу соҳада ривожланган давлатлар етакчи клиникаларида билим ва тажриба ошириб қайтмоқда.

Хусусан, Республика ихтисослаштирилган гематология илмий-амалий тиббиёт маркази жарроҳлари учун Россиянинг етакчи клиникасида ташкил этилган шундай малака ошириш курслари бошланиш арафасида.

Бутунроссия гемофилия жамияти президенти Юрий Жулевга кўра, Россия Федерацияси билан бир қаторда Ўзбекистонда ҳам шу давлатнинг ген терапияси тадқиқотлари ўтказиляпти. Мазкур клиник ўрганишлар натижасида беморларни даволаш муддатларини анча қисқартириш ва ногиронлик ҳолатларини камайтиришга эришиш мумкин.

Учрашувда шу каби ҳамкорлик лойиҳаларини кўпайтириш, ҳудудларда ташхислаш ва лаборатория хизматларини йўлга қўйиш, беморлар учун зарур дори воситаларини харид қилиш ва уларга шошилинч тиббий ёрдам кўрсатиш тизимини такомиллаштириш, болалар орасида қон ивиши бузилишининг олдини олиш каби долзарб масалалар муҳокама қилинди.