Сўм йилни мажор кайфиятда бошлади

Тошкент, Ўзбекистон (UzDaily.uz) — 2026 йил 8 январь ҳолатига кўра, ўзбек сўми АҚШ долларига нисбатан мустаҳкамланмоқда. Доллар курси 11 980 сўмни ташкил этмоқда. Бу эса 25 декабрдан бугунги кунга қадар сўм 0,68 фоизга ўсганини англатади. 2025 йил якунларига кўра эса сўм АҚШ долларига нисбатан қарийб 7 фоизга мустаҳкамланди.

2025 йилда Ўзбекистон иқтисодиётига киритилган инвестициялар ҳажми 43,1 млрд АҚШ долларига етди, бу йиллик ҳисобда 24 фоизлик ўсишни ташкил этди. Инвестиция оқимининг асосий қисмини тўғридан-тўғри хорижий инвестициялар — 38,2 млрд доллар ташкил қилди, яна 4,9 млрд доллар халқаро молиявий институтлар ҳиссасига тўғри келди.

Энг йирик инвесторлар сифатида Хитой, Россия, Туркия, шунингдек Саудия Арабистони ва БАА қайд этилди.

Инвестициялар ҳажмининг ўсиши ишбилармонлик муҳитининг яхшилангани ва глобал бизнеснинг ишончи ортиб бораётганини акс эттиради: мамлакат бозорига Volkswagen, Alshaya Group, Citi, Franklin Templeton, Sojitz, шунингдек АПК, тиббиёт ва логистика соҳаларидаги янги ўйинчилар кириб келди.

Шу билан бирга, ички иқтисодий оптимизм ҳам кучайди. Марказий банк маълумотларига кўра, аҳолининг қарийб учдан икки қисми яқин бир йил ичида даромадлар ошишини кутмоқда. Энг юқори ишонч савдо ва медиа соҳаларида кузатилмоқда, бу ерда ички айланманинг ўсиши ва рақамлаштириш муҳим устунлик бермоқда.

Умуман олганда, капитал оқими, инфратузилмавий лойиҳалар ва хўжалик юритувчи субъектларнинг ижобий кутилмалари уйғунлиги иқтисодий фаоллик учун барқарор асос яратмоқда ҳамда сўм барқарорлигини қўллаб-қувватламоқда.

Январь ойининг навбатдаги ҳафтасида доллар/сўм жуфтлиги 11 940–12 100 сўм оралиғида ҳаракатланиши кутилмоқда.

Анна Бодрова, Alpari таҳлилчиси