Солиқ қўмитаси такси ҳайдовчиларининг солиқ юкидан норозилиги ҳақидаги хабарларга изоҳ берди

Тошкент, Ўзбекистон (UzDaily.uz) — Сўнгги пайтларда ижтимоий тармоқларда «Онлайн-такси ҳайдовчилари солиқ юкидан норози» сарлавҳаси остидаги хабарлар кенг жамоатчилик эътиборини тортди. Ўзбекистон Республикаси Солиқ қўмитаси матбуот хизмати йўловчи ташиш ва етказиб бериш фаолияти билан шуғулланувчи ўзини ўзи банд қилган фуқаролар учун амал қилаётган солиққа тортиш тартибини тушунтириб берди.

Вазирлар Маҳкамасининг 2025 йил 2 апрелдаги 200-сон қарори 5-бандига мувофиқ, ўзини ўзи банд қилган фуқароларнинг 100 миллион сўмдан ошган даромадларидан солиқ агенти томонидан манбада 4 фоиз солиқ ушлаб қолинади. Онлайн-такси ҳайдовчилари ва йўловчи ташиш ҳамда етказиб бериш билан шуғулланувчи бошқа ўзини ўзи банд қилган шахслар учун айланмадан солиқ ушлаб қолиш такси агрегаторлари томонидан амалга оширилади.

2026 йил 1 январдан Солиқ кодексининг 467-моддасига киритилган ўзгартишлар кучга кирди. Энди йиллик айланмаси 1 миллиард сўмгача бўлган ўзини ўзи банд қилган шахслар ва такси ҳайдовчилари 1 фоиз миқдорида ягона ижтимоий солиқ тўлайди.

Шунингдек, Солиқ кодексининг 408-моддасига мувофиқ, ўзини ўзи банд қилган фуқаролар меҳнат стажини ҳисоблаш учун йилига камида бир базавий ҳисоблаш миқдорига тенг суммани ихтиёрий равишда тўлаш ҳуқуқига эга. Бу эса пенсия ва ижтимоий ҳуқуқларни шакллантириш имконини беради.

Солиқ қўмитаси амалдаги қоидалар шаффоф эканини, ўзини ўзи банд қилган фуқаролар учун солиқ режимини соддалаштиришга, даромадларни легаллаштиришга ҳамда йўловчи ташиш соҳасида меҳнат қилаётган ходимларнинг ижтимоий ҳимоясини таъминлашга қаратилганини таъкидлади.