Сирдарёда 700 млн сўмлик iPhone контрабандаси тўхтатилди

Тошкент, Ўзбекистон (UzDaily.uz) — Сирдарё вилоятида мобил қурилмаларнинг йирик партиясини ноқонуний олиб киришга уриниш бартараф этилди. Бу ҳақда Давлат божхона қўмитаси матбуот хизмати хабар қилди.

Қонунбузарлик Сирдарё вилояти божхона бошқармасининг контрабандага қарши кураш бўлими томонидан олинган тезкор маълумотлар асосида аниқланган.

Давлат божхона қўмитасининг Таргетлаш ва хавф-хатарларни мониторинг қилиш бошқармаси ходимлари, Давлат хавфсизлик хизмати ҳарбий қисми тезкор бўлинмаси ва вилоят Йўл ҳаракати хавфсизлиги бошқармаси ходимлари билан ҳамкорликда ўтказилган махсус тадбир доирасида Spark русумли автомобил тўхтатилди.

Автомобил аввалдан кузатув остига олинган фуқарога тегишли бўлиб, у Сирдарё тумани ҳудудидан ўтувчи М-39 автомобиль йўлида тўхтатилди.

Транспорт воситаси кўздан кечирилганда, багаж бўлимида божхона расмийлаштирувидан ўтмаган ва IMEI тизимида рўйхатдан ўтказилмаган хорижда ишлаб чиқарилган мобил телефонлар аниқланди. Шунингдек, қурилмаларга оид ҳужжатлар ҳам мавжуд эмаслиги маълум бўлди.

Текширув натижасида автомобилда жами 35 та смартфон борлиги аниқланди. Улардан 30 таси iPhone 17 Pro Max модели, яна 5 таси эса iPhone 17 Pro телефони экани маълум қилинди.

Дастлабки баҳолашларга кўра, мусодара қилинган техника умумий қиймати тахминан 700 миллион сўмни ташкил этади.

Аниқланган мобил қурилмалар ашёвий далил сифатида олиб қўйилди ва вақтинча сақлаш учун жойлаштирилди. Мазкур ҳолат юзасидан терговга қадар текширув ишлари олиб борилмоқда.