Тошкент, Ўзбекистон (UzDaily.uz) — 2 апрель куни Транспорт вазири ўринбосари Жасурбек Чориев «Sino Road and Bridge Corporation» корпорацияси хорижий бўлими ижрочи бош директори Джимми ЧАНГ бошчилигидаги делегация вакиллари билан учрашди.

Томонлар транспорт соҳасидаги инвестиция лойиҳаларини амалга оширишда Хитой компаниясининг иштирок этиш имкониятлари юзасидан фикр алмашди.

Жумладан, Джимми ЧАНГ «Sino Road and Bridge Corporation» корпорацияси темир йўл, авиация ва йўл хўжалиги инфратузилмаларини ривожлантириш лойиҳаларида иштирок этишдан манфаатдорлигини маълум қилди.

Транспорт вазири ўринбосари Ж. Чориев «Sino Road and Bridge Corporation» корпорациясига Тошкент, Самарқанд ва Қўқон шаҳарларида жойлашган темир йўл вокзалларини давлат-хусусий шериклик асосида модернизация қилиш ва бошқариш лойиҳаси ҳамда транспорт соҳасидаги бошқа истиқболли лойиҳаларда иштирок этишни таклиф қилди.

Учрашув якунида Ж. Чориев муҳокама этилган лойиҳалар юзасидан «Sino Road and Bridge Corporation» корпорациясига ҳар икки томон учун манфаатли бўлган аниқ таклифларни ишлаб чиқиш зарурлигини таъкидлаб ўтди.