Синдаров Есипенко билан дурангдан кейин етакчи бўлди

Тошкент, Ўзбекистон (UzDaily.uz) — Ўзбекистонлик гроссмейстер Жавоҳир Синдаров россиялик шахматчи Андрей Есипенко билан Номзодлар мусобақасининг саккизинчи турида дуранг ўйнади. Ушбу учрашув 7 апрель куни Кипрда бўлиб ўтди.

Синдаров қора донада ўйнаган партия 24-юришдан сўнг якунланди. Рақиблар тенг позицияда дурангга рози бўлишди.

Саккиз турдан сўнг ўзбекистонлик шахматчи 6,5 очко жамғарди, бешта ғалаба қозониб, уч марта дуранг ўйнади ва турнир жадвалида якка етакчиликни сақлаб қолмоқда. Унинг энг яқин таъқибчиси Фабиано Каруана устидан устунлиги икки очкога етди. Америка гроссмейстери Хикару Накамурага қора донада ўйнаб мағлуб бўлди.

Турнинг бошқа партияларида Рамешбабу Прагнанандха Аниш Гирига ютқазди, Маттиас Блюбаум ва Вэй И эса дуранг ўйнашди.

Тўққизинчи турда, 8 апрель куни Синдаров қора донада Блюбаумга қарши ўйнайди. Ушбу пайтга келиб, Блюбаум олтита партияни дуранг билан якунлаб, бир марта мағлуб бўлган.

Биринчи давра якунларига кўра, ўзбекистонлик шахматчи 7 имкондан 6 очко жамғарди ва бу Номзодлар мусобақаси замонавий тарихидаги энг яхши старт бўлди.

Турнир 29 мартдан 15 апрелгача Кипрда дунёнинг саккиз нафар энг кучли гроссмейстерлари иштирокида ўтказилмоқда. Мусобақа икки даврадан иборат бўлиб, жами 14 турни ўз ичига олади. Ғолиб амалдаги жаҳон чемпиони Доммараджу Гукешга қарши жаҳон шахмат тожи учун матч ўтказиш ҳуқуқини қўлга киритади. Турнирнинг мукофот жамғармаси 700 минг евродан иборат.