Тошкент, Ўзбекистон (UzDaily.uz) — Хитой Халқ Республикасида бўлиб турган вилоят ҳокими Хайрулло Бозоров Урумчи шаҳрида ўндан ортиқ шинжонлик тадбиркорлар ва компаниялар вакиллари билан учрашув ўтказди.

Ўзбекистоннинг Шинжон-Уйғур автоном райони билан товар айирбошлаш ҳажми ошаётган бўлиб, бугунги кунда мамлакатларимиз ўзаро савдосининг қарийб 10 фоизи шу ҳудудга тўғри келади.

ШУАРнинг етакчи компаниялари билан ҳамкорликдаги “яшил” энергетика ва электротехника, қурилиш тармоғи ва янги турдаги қурилиш материалларини ишлаб чиқариш, металлургия, инфратузилмани модернизация қилиш ва бошқа йўналишларда лойиҳалар амалга оширилмоқда.

Вилоят раҳбари компания вакиллари ва тадбиркорлар билан мулоқотда мамлакатимизда, хусусан, Фарғонада хорижий инвесторлар учун яратилган шароитлар, берилаётган имкониятлар ҳақида маълумот берди.

Шинжонлик тадбиркорлар вилоятимизда “ақлли” қишлоқ хўжалиги, қурилиш ва қурилиш маҳсулотлари, электротехника, алюмин эшик ва ромлар ишлаб чиқариш каби истиқболли лойиҳаларни амалга оширишга, Фарғонага инвестиция киритишга катта қизиқиш билдираётганликлари маълум қилинди.

Вилоят ҳокими уларнинг лойиҳаларини қўллаб-қувватлаб, ҳамкорликни бошлаш учун Фарғонага таклиф қилди.