Тошкент, Ўзбекистон (UzDaily.uz) — 26 июнь куни Хитойнинг Нингбо шаҳрида Шанхай ҳамкорлик ташкилоти (ШҲТ)га аъзо давлатлар Энергетика вазирларининг бешинчи йиғилиши бўлиб ўтди.

Унда ташкилотга аъзо давлатлар Энергетика вазирлари ҳамда ШҲТ Котибияти вакиллари иштирок этди.

Йиғилишда энергетика соҳасини барқарор ривожлантиришнинг ҳозирги ҳолати ва истиқболлари муҳокама қилинди. Халқаро энергетика бозорларидаги беқарорлик шароитида ҳамкорликни мустаҳкамлаш, шу жумладан, энергетика хавфсизлиги, энергетика инфратузилмасини ҳимоя қилиш, инвестициявий ҳамкорликка кўмаклашиш, шунингдек, минтақавий энергетикани барқарор ривожлантириш мақсадида адолатли энергетикага ўтиш муҳимлиги қайд этилди.

Шунингдек, 2030 йилгача бўлган даврда ШҲТга аъзо давлатларнинг энергетика ҳамкорлигини ривожлантириш стратегиясини амалга ошириш бўйича “Йўл харитаси” лойиҳаси устида ишлашни давом эттиришга келишиб олинди.

Анжуманда аъзо давлатлар раҳбарлари кенгашининг Барқарор энергетикани ривожлантириш бўйича қўшма баёноти лойиҳаси маъқулланди.

ШҲТга аъзо давлатлар Энергетика вазирларининг навбатдаги йиғилиши 2026 йилда Қирғизистонда ўтказилади.