Сергелида автобус ёниб, йўловчилар эвакуация қилинди

Тошкент, Ўзбекистон (UzDaily.uz) — 6 апрель куни кечқурун Тошкент шаҳрининг Сергели туманида Янги Сергели кўчаси бўйлаб ҳаракатланаётган автобусда ёнғин содир бўлди.

Ҳодиса ҳақида хабар Фавқулодда вазиятлар бош бошқармаси диспетчерлик хизматига соат 18:45 да келиб тушган.

Ёнғин-қутқарув бўлинмалари воқеа жойига олти дақиқа ичида етиб келди. Ёнғин ўчирувчиларнинг мувофиқлашган ҳаракатлари натижасида ёнғин соат 18:55 га қадар локализация қилиниб, тўлиқ бартараф этилди.

Барча йўловчилар ўз вақтида эвакуация қилинган, жабрланганлар йўқ.

Ёнғин сабаблари ва етказилган моддий зарар миқдори мутахассислар томонидан аниқланмоқда. Айни пайтда Янги Сергели кўчасида ҳаракат тикланган ва одатий тартибда амалга оширилмоқда.