Сергелидa автобус ёнғини сабаби маълум қилинди

Тошкент, Ўзбекистон (UzDaily.uz) — “Toshshahartransxizmat” АЖ матбуот хизмати 6 апрель куни кечқурун Тошкент шаҳар Сергелий туманида содир бўлган автобус ёнғини юзасидан изоҳ берди.

Компания маълумотларига кўра, ҳодиса соат 18:45 да Янги Сергели кўчасида 2012 йилда ишлаб чиқарилган Mercedes-Benz Low Floor русумли, 143-йўналишда хизмат кўрсатган автобус билан юз берган. Дастлабки маълумотларга кўра, ҳаракатланиш вақтида электр симларида юзага келган қисқа туташув ёнғинга сабаб бўлган.

Ҳайдовчи ёнғинни мустақил равишда ўчиришга ҳаракат қилган, бироқ аланга тарқалишда давом этган. Воқеа жойига етиб келган ёнғин-қутқарув бўлинмалари ёнғинни тезкорлик билан бартараф этган. Ҳодиса натижасида ҳеч ким жабрланмаган, аммо автобус техник шикастланган.

Компанияда таъкидланишича, ушбу ҳолат юзасидан техник назорат хизмати иштирокида ички текширув ўтказилмоқда. Транспорт воситаси аниқланган носозликлар тўлиқ бартараф этилгандан кейингина эксплуатацияга қўйилади.