Сербия Президенти Александр Вучич расмий ташриф билан Ўзбекистонга келди

Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёевнинг таклифига биноан Сербия Республикаси Президенти Александр Вучич рафиқаси билан бирга 28 октябрь куни расмий ташриф билан Тошкентга келди.

Пойтахт халқаро аэропортида нуфузли меҳмон ва унинг ҳамроҳидаги делегацияни Ўзбекистон Бош вазири Абдулла Арипов ҳамда бошқа расмий шахслар тантанали тарзда кутиб олди.

Ташриф доирасида олий даражадаги учрашув ва музокаралар ўтказилиши режалаштирилган бўлиб, уларда томонлар Ўзбекистон ва Сербия ўртасидаги ҳамкорликнинг ҳозирги ҳолати ва истиқболларини, сиёсий мулоқотни мустаҳкамлаш, шунингдек, савдо-иқтисодий, инвестициявий, маданий-гуманитар ва таълим соҳаларидаги ўзаро ҳамкорликни кенгайтириш масалаларини муҳокама қиладилар.

Бундан ташқари, Сербия Президенти Александр Вучич Самарқанд шаҳрида бўлиб ўтадиган ЮНЕСКО Бош конференциясининг 43-сессиясида фахрий меҳмон сифатида иштирок этади.

Александр Вучичнинг Ўзбекистонга расмий ташрифи икки давлат ўртасидаги муносабатларни мустаҳкамлаш ва ўзаро ҳурмат ҳамда стратегик шериклик руҳида халқаро ҳамкорликни кенгайтириш йўлидаги муҳим қадам бўлиб хизмат қилади.